ბავშვების ნაცვლად შინაური ცხოველების ყოლა ეგოიზმია

რომის პაპმა ფრანცისკემ ის წყვილები გააკრიტიკა, რომლებსაც ბავშვების ნაცვლად შინაური ცხოველების ყოლა ურჩევნიათ. პაპმა ასეთ ადამიანებს "ეგოისტები" უწოდა და თქვა, რომ მშობლობაზე უარის თქმა "ადამიანობის დაკარგვას იწვევს და ცივილიზაციას დიდ ზიანს აყენებს".

"ვხედავთ, რომ ადამიანებს არ სურთ ბავშვების გაჩენა ან მხოლოდ ერთი შვილი უნდათ. სამაგიეროდ, ბევრ წყვილს ჰყავს ორი კატა, ორი ძაღლი და ასე შემდეგ, ეს ცხოველები კი ბავშვების ადგილს იკავებენ. ეს სასაცილოა, მაგრამ რეალობაა. მამობასა და დედობაზე უარის თქმა ადამიანობას გვაკარგვინებს, ცივილიზაცია ბერდება და ჩვენი სამშობლოც იტანჯება, რადგან შვილები აღარ ჰყავს", — ამბობს პაპი ფრანცისკე.

პაპმა ხაზი გაუსვა კათოლიკური ეკლესიის სწავლებებს შვილების გაჩენისა და აღზრდის მნიშვნელობის შესახებ, რაზე უარის თქმასაც მძიმე დემოგრაფიული შედეგები მოჰყვება. პაპმა ფრანცისკემ იმ წყვილებს, რომლებსაც ბიოლოგიურად შვილების გაჩენა არ შეუძლიათ, ბავშვის აყვანაზე დაფიქრებისკენ მოუწოდა.

პაპმა მსგავსი შენიშვნები იმ წყვილების შესახებ, რომლებსაც შინაური ცხოველების ყოლა ბავშვის გაჩენას ურჩევნიათ, 2014 წელსაც გააკეთა. თუმცა ისიც უნდა აღინიშნოს, რომ პაპს ძაღლებთან, კოალებთან, ვეფხვებთან, ცხვრებთან და სხვა ცხოველებთან წლების განმავლობაში უამრავი ფოტო აქვს გადაღებული.