დღეს ახალ სპორტის სასახლეში პაატა ბურჭულაძის პარტიის "სახელმწიფო ხალხისთვის" პირველი ყრილობა გაიმართა, რომელზეც პარტიის თავჯდომარედ რეგიონების წარმომადგენლება პაატა ბურჭულაძე აირჩიეს. დასახელდნენ გუნდის წევრებიც.

"სახელმწიფო ხალხისთვის" წევრმა მერაბ მეტრეველმა თქვა, რომ პარტიის მიზანია შექმნას ის, რაც მათ სახელწოდებაშია, სახელმწიფო, რომელიც იქნება ხალხისთვის:

"ჩვენი პოლიტიკური მოძრაობა რეალური სიახლეა ჩვენს პოლიტიკურ ლანდშაფტში, ახალი ხალხით. ამ პოლიტიკურ სეზონზე ჩვენ ვართ მთავარი სიახლე. მთავარია დავამარცხოთ ის სისტემა, რომელიც სამწუხაროდ ვერ დაამარცხა ქართულმა ოცნებამ. ნაციონალური მოძრაობის დროს ჩვენ მხოლოდ პიროვნებებს ხომ არ ვებრძოდით, ჩვენ ვებრძოდით სისტემას. ჩვენი მთავარი კონკურენტია ქართული ოცნება და ნაციონალური მოძრაობაც, რომელიც უნდა ჩავაბაროთ წარსულს".

მოგვიანებით, On.ge-ს ჟურნალისტის კითხვაზე, მეტრეველმა დააზუსტა, რომ ახალმა პარტიამ წარსულს უნდა ჩააბაროს როგორც ქართული ოცნება, ისე ნაციონალური მოძრაობა.

მერაბ მეტრეველის თქმით, საარჩევნო პროგრამა და სია "თავის დროზე იქნება ცნობილი".