მიხეილ სააკაშვილის ცოლის, ლიზა იასკოს განცხადებით, არსებობს ინფორმაცია, რომ ექსპრეზიდენტი წააქციეს, ხელბორკილები დაადეს და რუსთავის ციხეში ისე გადაიყვანეს. იასკო მიიჩნევს, რომ სააკაშვილი სასჯელაღსრულებით დაწესებულებაში ღამით იმიტომ წაიყვანეს, რომ ამას სწრაფი რეაქცია არ მოჰყოლოდა.

"ძალის გამოყენებით გაიტაცეს გორის ჰოსპიტლიდან. დაუდასტურებელი ინფორმაციით, ის წააქციეს, დაადეს ხელბორკილები. როგორ მდგომარეობაშია, დაკარგა თუ არა გონება, არავინ იცის. ეს ყველაფერი ცინიკურად, ღამით გაკეთდა, როდესაც ყველას სძინავს. ღამეა უკრაინაშიც, ევროპის ქვეყნებშიც საშობაო არდადეგებია, ეს კეთდება იმისთვის, რომ ამ ქმედებაზე სწრაფი რეაქცია არ იყოს. აბსურდია იმის მტკიცება, რომ ის ჯანმრთელია, ვიცი, რომ იმავე დღეს ის ფეხზე არ დგებოდა და ძალზე ცუდ მდგომარეობაში იყო", — განაცხადა მან.

იასკოს თქმით, იმედი აქვს, რომ უკრაინისა და საერთაშორისო პარტნიორების ჩართულობით სააკაშვილის სიცოცხლის გადარჩენას მოახერხებენ.

გუშინ, 29 დეკემბერს სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება ამ დრომდე არცერთ უწყებას გაუვრცელებია.

დღეს, 30 დეკემბერს ქართული ოცნების დეპუტატმა, დავით სეგეენკომ განაცხადა, რომ ყოფილი პრეზიდენტის გორის ჰოსპიტლიდან გადაყვანა მოულოდნელი არავისთვის უნდა ყოფილიყო. მისი თქმით, ყველასათვის ცნობილი იყო, რომ მდგომარეობის დასტაბილურებისთანავე სააკაშვილს სასჯელაღსრულების დაწესებულებაში დააბრუნებდნენ.