გირჩი — მეტი თავისუფლების წევრი, გოგიტა რობიტაშვილი ამბობს, რომ დედოფლისწყაროში, საკუთარ ავტოფარეხში უცხო პირები ფიზიკურად თავს დაესხნენ. როგორც ის On.ge-ს უყვება, გუშინ, 25 დეკემბერს თბილისში, პარტიის ყრილობაზე იმყოფებოდა, რის შემდეგაც, საღამოს, სახლში გაემგზავრა, საკუთარ ავტოფარეხში მისულს კი თავს დაესხნენ. მისი თქმით, თავდამსხმელებს არაფერი მოუთხოვიათ. რობიტაშვილი მომხდარს მის პოლიტიკურ აქტიურობას უკავშირებს.

"ყრილობის შემდეგ წამოვედი მიკროავტობუსით, მანქანა მყავდა დედოფლისწყაროს ავტოსადგურში და მიკროავტობუსიდან იქ გადავჯექი. როცა სახლში მივედი, მანქანა ავტოფარეხში შევაყენე და უკვე ვხურავდი კარებს, როცა თავს დამესხნენ. რაღაც ბლაგვი საგანი ჩამარტყეს და დავეცი. 3-4 ადამიანი იყო", — ამბობს ის.

ფოტო 2: გირჩი — მეტი თავისუფლება

რობიტაშვილის ინფორმაციით, გონება დაკარგა, თუმცა დაინახა, რომ თავდამსხმელებს შავები ეცვათ, იყვნენ ქუდებით და შავი პირბადეები ეკეთათ. მისი თქმით, ჩამტვრეული აქვს ყვრიმალის ძვალი და სტკივა ნეკნები, რის გამოც ხვალ ექიმთან თბილისში აპირებს მისვლას. უშუალოდ შემთხვევის დღეს კი გამოიძახა სასწრაფო დახმარების ბრიგადა და პოლიცია, რომელმაც, მისი თქმით, საქმე აღძრა.

"აღიძრა, მაგრამ ტყუილად. არცერთი საქმე არ დამთავრებულა, ეს მეორე შემთხვევაა. ერთხელ დამიმტვრიეს მანქანა და არ გარკვეულა არაფერი. ახლა ეს არ იკმარეს და გამისწორდნენ ფიზიკურად. ჩემს პოლიტიკურ აქტიურობას ვუკავშირებ. ჰყავთ აქ ტიტუშკები, ძალიან ბევრი, მით უმეტეს, ღარიბაშვილის რაიონია და ოღონდაც ასიამოვნონ ამ ადამიანს", — ამბობს ის.

On.ge დაუკავშირდა შინაგან საქმეთა სამინისტროს. მათ პასუხს მიღებისთანავე შემოგთავაზებთ.

განახლება: შინაგან საქმეთა სამინისტროს ინფორმაციით, გამოძიება დაწყებულია საქართველოს სისხლის სამართლის კოდექსის 126-ე მუხლის პირველი პრიმა ნაწილის "ბ" ქვეპუნქტით, რაც ჯგუფურ ძალადობას გულისხმობს.