ლელოს ერთ-ერთი ლიდერი, მამუკა ხაზარაძე პარლამენტის თავმჯდომარის, კახა კუჭავას მიერ თანამდებობის დატოვების გადაწყვეტილებასთან დაკავშირებით ამბობს, რომ 5 პრემიერმინისტრი და 5 პარლამენტის თავმჯდომარე შეიცვალა 9 წლის განმავლობაში და გაუგებარია რა სტაბილურობაზეა საუბარი.

"5 პრემიერი, 5 პარლამენტის თავჯდომარე 9 წელიწადში. რა სტაბილურობაზეა საუბარი, რა საგარეო ურთიერთობაზე, რა ეკონომიკურ პროგრამებზე, რა ინვესტიციაზე და რა სამუშაო ადგილებზე? რა ნიშნით ინიშნებიან, რის გამო თავისუფლდებიან? სად არის პროგრამა, სად არის ანგარიში? სად არის პასუხისმგებლობა?არაფერი ასეთი!

ასე ხდება მხოლოდ ისეთ ქვეყანაში, რომელშიც თავისუფლების გემო დავიწყებულია, რომელშიც ხმები იყიდება, რომელშიც სამართლიანი მართლმსაჯულება არ არსებობს, რომელშიც სამოქალაქო საზოგადოება დუმს, რომელშიც ქვეყნის თითქმის ყველა ინსტიტუცია მიტაცებულია ერთი კაცის მიერ...

ბრძოლა გრძელდება!

ბრძოლა ამ მარაზმის დასამთავრებლად და ნამდვილი ქართული დემოკრატიული სახელმწიფოს ასაშენებლად", — წერს ხაზარაძე ფეისბუქგვერდზე.

კახა კუჭავა გადადგა, პარლამენტის თავმჯდომარის პოსტზე კი შალვა პაპუაშვილი წარადგინეს. ამის შესახებ პარტიის თავმჯდომარემ, ირაკლი კობახიძემ 24 დეკემბერს გამართულ სპეციალურ ბრიფინგზე ისაუბრა. მისი თქმით, კუჭავას ეს გადაწყვეტილება პარტიისთვის "გულდასაწყვეტი" იყო, თუმცა ცნობად მიიღეს.

კუჭავას თქმით, ის ძალიან მნიშვნელოვან პროექტს უხელმძღვანელებს, რაზეც საზოგადოება უფრო მეტ დეტალს მომავალ წელს გაიგებს. კუჭავას ამბობს, რომ ეს მის მიერ თანამდებობის დატოვების ყველა მიზეზს "ახსნის".

პარლამენტის თავმჯდომარის პოსტზე ქართულმა ოცნებამ შალვა პაპუაშვილი წარადგინა.