ერთიანი ნაციონალური მოძრაობის ერთ-ერთი ლიდერის, ლევან ხაბეიშვილის განცხადებით, შერიგების პროცესთან დაკავშირებით ბევრი კითხვა არსებობს, თუმცა "კობახიძესთან ჩახუტებას არავინ არ აპირებს".

"ვიღაცები ამბობენ და მე მინდა აგიხსნათ თქვენც, ავუხსნა საზოგადოებასაც, ძალიან ბევრი კითხვაა, რომ ვის უნდა შევურიგდეთ, რომ ვის უნდა გავურიგდეთ, რომ რა თანხმობა გვჭირდება. მეგობრებო, ახლა არავინ არ გაგიჟებულა და კობახიძესთან ჩახუტებას არავინ არ აპირებს", — თქვა მან ენმ-ის აქციაზე სიტყვით გამოსვლისას.

მისივე თქმით, ისინი უნდა შეთანხმდნენ სამართლიან თამაშის წესებზე, იმაზე, რომ ქვეყანაში არ იყვნენ პოლიტიკური პატიმრები, განხორციელდეს სასამართლოს რეფორმა, მოხდეს ძალოვანი უწყებების დეპოლიტიზირება და ჩატარდეს თავისუფალი არჩევნები.

"ჩვენ უნდა შევთანხმდეთ სამართლიან თამაშის წესებზე და ამას აქვს კონკრეტული სახელები, პირველი — ქვეყანაში არ უნდა იყვნენ პოლიტიკური პატიმრები, ანუ მათ შორის, თავისუფალი უნდა იყოს პრეზიდენტი სააკაშვილი, ქვეყანაში უნდა იყოს თავისუფალი სასამართლო და ამას არ საუბრობს მხოლოდ ოპოზიცია, ამას არ საუბრობს მხოლოდ ქართველი ხალხი. ამას მოგვიწოდებს ცივილიზებული სამყარო, ამას საუბრობს ყველა, რომ ჩვენს ქვეყანაში კლანური მმართველობაა, კლანური სასამართლოა და მათ შორის, ყოველდღიურ რეჟიმში აკეთებენ განცხადებას, რომ ასე თავისუფალი საქართველო არ აშენდება, ამიტომ ამ შეთანხმების, შერიგების ერთ-ერთი პუნქტი არის თავისუფალი სასამართლო, დეპოლიტიზირებული სასამართლო, რომელიც მოემსახურება ხალხს და არა ოლიგარქ ივანიშვილს.

მესამე და მნიშვნელოვანი საკითხი არის დეპოლიტიზირებული ძალოვანი უწყებები და არა ჯარჯი წიკლაურისნაირი ქართული ოცნების აქტივისტები, რომლებიც სასამართლოზე სამართლებრივად კი არ დაობენ, პოლიტიკურ განცხადებებს აკეთებენ და თვითონ და მისი ოჯახის წევრები შოულობენ მილიონებს და ამასობაში გვიყვებიან, რომ ამას აკეთებენ 2 000-3 000-ლარიანი ხელფასებით, იშენებენ ვილებს, აგროვებენ მილიონობით ლარის ქონებას. მეოთხე საკითხი არის თავისუფალი არჩევნები", — განაცხადა ხაბეიშვილმა.

დღეს, 22 დეკემბერს რუსთაველის გამზირზე ერთიანი ნაციონალური მოძრაობის აქცია იმართება.