განათლებისა და მეცნიერების მინისტრმა ალექსანდრე ჯეჯელავამ, რომელიც პარლამენტში იმყოფება, პრეზიდენტ გიორგი მარგველაშვილის სიტყვით გამოსვლა შეაფასა.

მინისტრმა საზოგადოებრივ მაუწყებელთან ინტერვიუში განაცხადა, რომ პრეზიდენტის სიტყვა მეტად ზოგადი იყო და გაუმართლებელიც, რადგან [პრეზიდენტმა] არ აღნიშნა მიღწეული პროგრესის შესახებ:

"ცოტა უფრო მეტ კონკრეტიკასა და მეტ დეტალიზაციას მოველოდით, რაღაც საკითხებში. იმის თქმა პირველი პირისგან რომ სასამართლოში არის კრიზისი, სრულიად გაუმართლებელია. ასევე ეკონომიკური პროგრესის და თითოეული ოჯახისთვის ამ პროგრესის მინიმიზაცია და არ აღნიშვნა, ჩემი აზრით, არ არის პროგრესული. ასევე, ძალიან მნიშვნელოვანია, რომ ბევრი მიმართებით, რაც შეეხება საზოგადოების გაერთიანებას, რაც შეეხება იგივე სასამართლო რეფორმას, ადამიანის უფლებებსა და მედიის თავისუფლების მიმართულებით, რასაც ადასტურებს საერთაშორისო ორგანზიაციების ყველა რეიტინგი, ყველა ანგარიში და ყველა შეფასება, ამას არასაკმარისად შეეხო პრეზიდენტი".

საქართველოს პრეზიდენტი, გიორგი მარგველაშვილი დღეს, პარლამენტის პლენარულ სხდომაზე ყოველწლიური ანგარიშით წარსდგა. გამოსვლისას განაცხადა, რომ ეკონომიკური რეფორმების შემუშავება და დანერგვა ბიზნესთან კონსულტაციების გარეშე არ უნდა ხდებოდეს. პრეზიდენტი მიიჩნევს, რომ საჭიროა კონკურენციის კანონის უფრო ქმედითად ფორმულირება, აღსრულება და კონკურენციის სააგენტოს უფრო გააქტიურება. გარდა ამისა, მან ქვეყანაში არსებულ კრიმუნალურ მდგომარეობაზე, ე.წ. მოსმენების კანონზე და მედიაგარემოზე ისაუბრა.