ჩინეთში კაცმა ყოფილ შეყვარებულს $24 ათასი მაშინ მოპარა, როდესაც ქალი თავს ცუდად გრძნობდა და ეძინა. 28 წლის ჰუანი 2020 წლის დეკემბერში ქალს სახლში ესტუმრა. "მზრუნველმა" ჰუანმა ქალს საჭმელი მოუმზადა და შიგ გაციების წამალიც შეურია, რომლის გამოც შეყვარებულს ძილი მოერია. ამის შემდეგ მობილური ტელეფონისთვის ბლოკის მოსახსნელად მძინარე შეყვარებულის თითის ანაბეჭდი გამოიყენა.

ამბავი ასე მარტივად არ დასრულებულა. ტელეფონის ხელში ჩაგდების შემდეგ, გადახდის ერთ-ერთ აპლიკაციაში, Alipay-ში შესასვლელად ჰუანმა მძინარე შეყვარებულს ქუთუთოები აუწია და შეუძლოდ მყოფ ქალს $24 ათასი მოპარა.

მეორე დღეს ქალმა უცნაური ტრანზაქციები შეამჩნია და პოლიციას მიმართა. როცა დამნაშავის ვინაობა შეიტყო, ჰუანი ქალაქიდან უკვე გაქცეული იყო.

სამართალდამცავმა ორგანოებმა კაცს მხოლოდ აპრილში მიაგნეს. როგორც აღმოჩნდა, მას აზარტული თამაშების გამო უამრავი ვალი ჰქონდა და მოპარული თანხაც ამ მიზნით გამოიყენა. მას 3,5-წლიანი პატიმრობა მიესაჯა.

Alipay-ის წარმომადგენელმა განაცხადა, რომ დაზარალებული ქალი შესაბამის კომპენსაციას მიიღებს. მან მომხმარებლებს საკუთარი ანგარიშების დასაცავად რამდენიმე მექანიზმის გამოყენება ურჩია.