საგარეო საქმეთა მინისტრმა, დავით ზალკალიანმა ჟურნალისტს ჰკითხა, "ვისგან მოდიოდა" მისი კითხვები. მან მთავარი არხის ჟურნალისტს, თათია წოწონავას უთხრა, რომ ის და მისი მამა, მანუჩარ წოწონავა კოლეგები იყვნენ. ზალკალიანის თქმით, სწორედ ამიტომ დაინტერესდა მისგან ხომ არ მოდიოდა კითხვები.

"თქვენ ჩემზე ზრუნავთ, ძაან გაღელვებთ ჩემი ბედი და აბა მითხარი, მამისგან მოდის თუ იმისგან, ვინც გეუბნებათ ... ჩვენი კოლეგა იყო მამა, თქვენი და იმიტომ გეუბნები. რავიცი, ისე შვილი და მამები ... რავიცი, რავიცი", — უთხრა მინისტრმა ჟურნალისტს.

მას შემდეგ, რაც ჟურნალისტმა ზალკალიანს უთხრა, რომ კითხვების დასმა თავადაც შეეძლო, ზალკალიანმა უპასუხა:

"როგორ არა, აბა რა, აბა რა".

ჟურნალისტები საგარეო საქმეთა ზალკალიანს კითხვებს პრემიერმინისტრთან ურთიერთობის შესახებ უსვამდნენ. გუშინ, 2021 წლის ანგარიშის წარდგენისას ირაკლი ღარიბაშვილმა რამდენიმე მინისტრს პერსონალური მადლობა გადაუხადა, თუმცა მათ შორის ვერ მოხვდა დავით ზალკალიანი. სწორედ ამის შესახებ დასმულ კითხვას მოჰყვა ზალკალიანის რეპლიკა.

საგარეო საქმეთა მინისტრს გამოეხმაურა თავად მანუჩარ წოწონავა, რომელიც წლების განმავლობაში სამთავრობო უწყებებში მუშაობდა. მათ შორის, საგარეო საქმეთა სამინისტროში. მანუჩარ წოწონავა იყო საქართველოს კონსული ოდესაში. მან სოციალური ქსელის საშუალებით საჯაროდ მიმართა დავით ზალკალიანს და განაცხადა, რომ არასდროს უფიქრია თავის საქმეებში შვილის გარევა.

"არასდროს არ მიკადრებია ჩემს საქმეებში შვილის გარევა, ასეთი მარტივი ჭეშმარიტება თუ ვინმესთან მექნებოდა ასახსნელი, მითუმეტეს ყოფილ კოლეგასთან და თანამდებობის პირთან, ნამდვილად არ მეგონა. თანამდებობები წარმავალია ჩემო დათო, მთავარია სახის შენარჩუნება, დამიჯერე, ამ შენი კომენტარით კი შენს თავს უფრო მიაყენე შეურაცხყოფა, ვიდრე მე, ან მით უმეტეს ჩემს შვილს", — წერს წოწონავა.

შემთხვევას გამოეხმაურნენ მთავარ არხშიც. ტელეკომპანიის საინფორმაციო სამსახურის უფროსმა, თეო გილიგაშვილმა განაცხადა, რომ თათია წოწონავას კითხვების დაწერა არ სჭირდება, რადგან "დამოუკიდებლად აზროვნებაც და მოქმედებაც შეუძლია".