ევროპული საბჭოს პრეზიდენტის, შარლ მიშელის განცხადებით, ევროკავშირის და აღმოსავლეთ პარტნიორობის ქვეყნების არა მხოლოდ მეზობლები, არამედ ნამდვილი პარტნიორები არიან. ამის შესახებ მან ბრიუსელში გამართული სამიტის დასრულების შემდეგ Twitter-ზე დაწერა.

"ევროკავშირი და აღმოსავლეთ პარტნიორები მხოლოდ მეზობლები არ არიან — ჩვენ ნამდვილი პარტნიორები ვართ. მზარდი დაძაბულობის ფონზე, სოლიდარობა და თანამშრომლობა სასიცოცხლოდ მნიშვნელოვანია, ვიდრე ოდესმე

შარლ მიშელმა ისაუბრა სამიტის შემდეგ გამართულ პრესკონფერენციაზეც და აღნიშნა, რომ ეს სამიტი და პარტნიორობა ღირებულებებს, კანონის უზენაესობას, კარგ მმართველობას, ფუნდამენტურ უფლებებსა და დემოკრატიულ პრინციპებს ეფუძნება. მისი თქმით, აღმოსავლეთ პარტნიორობის ქვეყნებთან თანამშრომლობის დროს, ევროკავშირის ამბიციის საფუძველი სწორედ ეს ფასეულობებია.

"ეს სამიტი იყო შესაძლებლობა, რომ კიდევ ერთხელ დაგვედასტურებინა ჩვენი მზაობა, რომ მხარი დავუჭიროთ აუცილებელი რეფორმების პროცესებს, რეფორმების, რომლებიც აუცილებელია ამ პარტნიორობის მომავლისთვის და მიმართულია მოქალაქეთა მოლოდინებისა და სოციალური ერთიანობისკენ", — აღნიშნა მან.

მისივე თქმით, სამიტზე ხაზი გაუსვეს უკრაინის მიმართ მათ მხარდაჭერას. შარლ მიშელის განცხადებით, რუსეთის მიერ უკრაინის წინააღმდეგ შესაძლო აგრესიას მკაცრი რეაქცია მოჰყვება.

15 დეკემბერს ბრიუსელში აღმოსავლეთ პარტნიორობის სამიტი გაიმართა. საქართველოს სამიტზე პრემიერმინისტრი, ირაკლი ღარიბაშვილი წარმოადგენდა.