საქართველოს პრემიერმინისტრის, ირაკლი ღარიბაშვილის განცხადებით, NATO-ს წევრობა საქართველოს საგარეო და უსაფრთხოების პოლიტიკის უმთავრესს საკითხს წარმოადგენს. მისი თქმით, 2008 წლის ბუქარესტის სამიტის გადაწყვეტილების პრაქტიკული რეალიზაციისათვის გულდასმით შრომობენ.

"ალიანსთან მჭიდროდ ვთანამშრომლობთ, საბოლოო ჯამშიც, NATO-ში საქართველოს ინტეგრაციის მკაფიო ხედვის შესამუშავებლად, გაწევრიანებისთვის ყველა პრაქტიკული ინსტრუმენტი გაგვაჩნია უკვე და აქტიურ დიალოგს ვაწარმოებთ მოკავშირეებთან, რათა პოლიტიკური გადაწყვეტილება მომზადდეს NATO-ში საქართველოს გაწევრიანებასთან დაკავშირებით.

მინდა, ყველას გაგახსენოთ, რომ 2008 წლის ბუქარესტის სამიტზე მოკავშირეებმა გადაწყვიტეს, რომ საქართველო ალიანსის წევრი გახდებოდა. მაშინ ეს ძალიან ძლიერი გზავნილი იყო და დღესაც ინარჩუნებს აქტუალურობას. სწორედ ამიტომ, გულდასმით ვშრომობთ 2008 წლის ბუქარესტის სამიტის გადაწყვეტილების პრაქტიკულ რეალიზაციაზე" — აცხადებს ის [სინქრონული თარგმანი].

მისივე თქმით, საკუთარი საგარეო პოლიტიკური კურსის არჩევის სუვერენული უფლება ყველა სახელმწიფოს გააჩნია. ღარიბაშვილის განცხადებით, ეს გადაწყვეტილება ის ქვაკუთხედია, რომელსაც NATO-ში საქართველოს გაწევრიანების პროცესი ეფუძნება.

"საქართველომ მნიშვნელოვან წინსვლას მიაღწია ევროატლანტიკური ინტეგრაციისკენ მიმავალ გზაზე. გვჯერა, რომ ჩვენი ინტეგრაციის პროცესის გააქტიურების და კონკრეტული პოლიტიკური გადაწყვეტილებების მიღების დრო დადგა. ეს იქნება მკაფიო გზავნილი ყველა ასპირანტი ქვეყნისთვის, რომ მიზანდასახულობას, ერთგულებას და დაუღალავ შრომას რეალური შედეგები მოაქვს. ეს იქნება ძლიერი გზავნილი, რომლის ექოც ფართოდ გადასცდება მთელს რეგიონს და ყველა დარწმუნდება, რომ NATO აქ არის და უფრო ძლიერია, ვიდრე ოდესმე", — ამბობს ღარიბაშვილი [სინქრონული თარგმანი].

დღეს ბრიუსელში აღმოსავლეთ პარტნიორობის სამიტი იმართება. სამიტამდე საქართველოს პრემიერმინისტრი, ირაკლი ღარიბაშვილი NATO-ს გენერალურ მდივანს, იენს სტოლტენბერგს შეხვდა.