საკრებულოს ოპოზიციონერმა დეპუტატებმა ბათუმის მერის, არჩილ ჩიქოვანის კაბინეტში აქცია გამართეს, რის შემდეგაც მათ პოლიციამ ადგილი ძალის გამოყენებით დაატოვებინა. ოპოზიციის განცხადებით, ზედამხედველობის სამსახურის თანამშრომელი სამშენებლო ობიექტზე, სადაც უკანონო მშენებლობა მიმდინარეობდა, იარაღით გადაადგილდებოდა.

"სწორად მიგაჩნიათ თუ არა შეიარაღებული თანამშრომელი, მერიის თანამშრომელი? მე ვიცი რომ ის სუს-ის თანამშრომელია და წლების განმავლობაში მუშაობდა, კითხვა მაქვს: თქვენ როგორ მიგანჩნია, რომ ზედამხედველობის სამსახურის თანამშრომელი მიდის ობიექტზე, რომელიც არის უკანონო, მიდის და იქ იარაღს ატრიალებს. 90-იან წლებში ხომ არ ვართ?", — ჰკითხეს ჩიქოვანს.

საპასუხოდ, ბათუმის მერმა განაცხადა, რომ მუნიციპალური ინსპექცია თავისი უფლებამოსილებას ახორციელებდა, ხოლო, დანარჩენზე გამოძიება მიმდინარეობს.

ოპოზიციამ ჩიქოვანს უთხრა, რომ თუ ამაზე რეაგირება არ ექნებოდა, ნიშნავდა იმას, რომ კორუმპირებულია. რაზეც ჩიქოვანმა მათ შეურაცხმყოფელი განცხადებებისგან თავის შეკავებისკენ მოუწოდა.

დეპუტატებმა მერს სახელმწიფო აუდიტის დასკვნა მიუტანეს. მათი განცხადებით, დასკვნაში წერია, რომ მერიაში კორუფციაა და 119 ობიექტიდან 45 უკანონოდაა აშენებული. ამის შემდეგ მერს ჰკითხეს: "არის თუ არა ეს კორუფცია?". ჩიქოვანმა ოპოზიციის აქციას "მასკარადი" უწოდა და თქვა, რომ თუ ეს გაგრძელდება "დაცვის სამსახური ინსტრუქციის შესაბამისად იმოქმედებს". მოგვიანებით, ოპოზიციის წევრები პოლიციამ კაბინეტიდან ძალის გამოყენებით გაიყვანა.

მანამდე ჩიქოვანმა შეხვედრა დატოვა და თქვა, რომ მონიტორინგის ფარგლებში მისულ ინსპექციის თანამშრომელს მოქალაქეებმა წინააღმდეგობა გაუწიეს, ხოლო დანარჩენს გამოძიება დაადგენს.

"იმ კონკრეტულ ობიექტზე, რომელზეც შესაბამისი სანებართვო დოკუმენტაციის დარღვევებით მიდმინარეობდა წარმოება, მონიტორინგის ფარგლებში ინსპექციის თანამშრომელი იმყოფებდა ადგილზე, სადაც მოხდა მოქალაქეთა მხრიდან წინააღმდეგობოს გაწევა, ჩვენ ჩვენს ნაწილში წარმოებას განვაგრძობთ და ბუნებრივია, შესაბამისი რეაგირება იქნება. დანარჩენ ნაწილთან დაკავშირებით ვიცით, რომ დაწყებულია გამოძიება", — განაცხადა მან.

მას შემდეგ რაც ოპოზიცია კაბინეტიდან გამოიყვანეს, მის მიმდებარედ ათობით პოლიციელი განლაგდა. დეპუტატების განმარტების მიუხედავად, რომ მათ თათბირზე შესვლის უფლება აქვთ, ამის საშუალება მათ სამართალდამცავებმა არ მისცეს.

როგორც On.ge-ს შინაგან საქმეთა სამინისტროში განუცხადეს, მომხდარზე გამოძიება სისხლის სამართლის 151-ე, მუქარის მუხლითაა დაწყებული.