თეთრი სახლის პრესმდივნის, ჯენ ფსაკის განცხადებით, აშშ-ის პრეზიდენტი, ჯო ბაიდენი მხარს უჭერს ნებისმიერ ქვეყანას, ვისაც NATO-ში გაწევრიანება უნდა. ამის შესახებ მან 9 დეკემბერს ბრიფინგზე ისაუბრა.

"პრეზიდენტს ამის შესახებ წარსულშიც უსაუბრია. ცხადია, არის მოთხოვნები ნებისმიერი ქვეყნისთვის, რომელსაც NATO-სა და სხვა ალიანსებში გაწევრიანება სურს — რასაც პრეზიდენტი, რა თქმა უნდა, მხარს უჭერს. ის ნამდვილად მხარს უჭერს უკრაინის მისწრაფებებს. არსებობს გარკვეული მოთხოვნები, რომელიც მთელ რიგზე საკითხებზე უნდა დააკმაყოფილონ, მათ შორის, კორუფცია და სხვა თემები. თავის მხრივ, NATO-ს პარტნიორი ქვეყნებისა და თავად ალიანსის გადასაწყვეტია, როგორი იქნება სამომავლო გზა", — აღნიშნა მან.

მისივე თქმით, საბოლოოდ ეს რუსეთის პრეზიდენტის, ვლადიმერ პუტინის გადასაწყვეტია, შეიჭრება თუ არა უკრაინაში და მსოფლიო საზოგადოებას გაუგზავნის მესიჯს, რომ ტერიტორიულ მთლიანობას პატივს არ სცემს, მაშინ, როცა აშშ და სხვა პარტნიორები ამ ქმედების ეკონომიკურ შედეგებზე მკაფიოდ საუბრობენ.

გუშინ უკრაინის საგარეო საქმეთა მინისტრმა, დმიტრი კულებამ ისაუბრა, რომ მზად არიან რუსეთთან დათმობაზე, თუ ეს იქნება ლეგიტიმური მოთხოვნები და არა ისეთი ფუნდამენტური მნიშვნელობის საკითხები, რომლებზეც უკრაინის განვითარება დგას.

აშშ-მ და მოკავშირე ოფიციალურმა პირებმა განგაში ჯერ კიდევ გასულ თვეს ატეხეს. ამერიკული დაზვერვის წარმომადგენლებმაც მოკავშირეები გააფრთხილეს, რომ ცოტა დრო დარჩა, რათა რუსეთს უკრაინაში სამხედრო მოქმედებების განხორციელებაში ხელი შეუშალონ. აშშ-მ ევროპულ ქვეყნებს მოუწოდა შეერთებულ შტატებთან იმუშაონ, რათა მოსკოვის შეკავების მიზნით ეკონომიკური და სამხედრო ზომების პაკეტი შეიმუშაონ.

უკრაინის თავდაცვის სამინისტრომ ნოემბრის დასაწყისში განაცხადა, რომ მის საზღვართან დაახლოებით, 90 000 რუსი ჯარისკაცი გადაისროლეს. გაურკვეველი იყო, რამდენი მათგანი იყო ადგილზე ახლად განლაგებული.