"თანაშემწის მოადგილე რა უბედურებაა?" — ასე პასუხობს ქართული ოცნების გენერალური მდივანი და ქალაქის მერი კახა კალაძე კითხვას, აშშ-ის სახელმწიფო მდივნის თანაშემწის მოადგილის, ერიკა ოლსონის კრიტიკული განცხადების შესახებ. კალაძეს განუმარტეს, რომ ის სახელმწიფო დეპარატმენტის მაღალჩინოსანია, რაზეც მან განაცხადა:

"თანაშემწე და იმის მოადგილე კიდე? არ ვიცოდი ეგეთი თანამდებობა თუ იყო".

ამერიკის ხმის ინფორმაციით, აშშ-ის სახელმწიფო მდივნის თანაშემწის მოადგილემ, ერიკა ოლსონმა განაცხადა, რომ საქართველოს მთავრობამ ზოგიერთ დემოკრატიულ პროცესს "ძირი გამოუთხარა". ოლსონმა აღნიშნა, რომ სურს, შესრულდეს საარჩევნო და სასამართლო რეფორმები.

"ჩვენ გავაგრძელებთ საქართველოს ევრო-ატლანტიკური მისწრაფებების მტკიცე მხარდაჭერას და როგორც ახლო პარტნიორებს, გვსურს საქართველოს დავეხმაროთ იმ სასამართლო და საარჩევნო რეფორმების განხორციელებაში, რომლებზეც თავად გადაწყვიტეს, რომ ისინი ქვეყნის მომავლისთვის მნიშვნელოვანი იქნებოდა. ჩვენ გვაწუხებს ის, რომ მთავრობის მოქმედებებმა ძირი გამოუთხარა ზოგიერთ ამ პროცესს. მმართველმა პარტიამ პირობა დადო, რომ საარჩევნო და სასამართლო რეფორმებს განახორციელებდა. ჩვენ ძალიან გვსურს ვიხილოთ ამ პირობების შესრულების მიმართულებით გადადგმული ნაბიჯები", — ამბობს ის.

აშშ-ს ელჩმა, კელი დეგნანმა უკვე რამდენჯერმე აღნიშნა, რომ უზენაეს სასამართლოში მოსამართლეების დანიშვნის პროცესის დაჩქარებულად გაგრძელებით იმედგაცრუებულია. ევროკავშირის ელჩი კარლ ჰარცელი კი პარლამენტში მოსამართლეების მოსმენაზე არ მივიდა. მან განმარტა, რომ მოსამართლეთა არჩევის პროცესი არ არის შესაბამისობაში შარლ მიშელის შეთანხმებასა და მაკროფინანსური დახმარების მიღების სანაცვლოდ წაყენებულ პირობებთან. პარლამენტმა კი ამ განცხადებების მიუხედავად 4 მოსამართლე უზენაეს სასამართლოს წევრებად აირჩია.

ჰარცელი ასევე საუბრობს, რომ მნიშვნელოვანია, საარჩევნო სისტემაზე ფართო კონკურენციით მიღებული შედეგი არ დაიკარგოს. მისივე თქმით, ახლაც შესაძლებელია საუბარი იმაზე, თუ რა არის ოპტიმალური პროცენტული მაჩვენებელი პლურალიზმის მისაღწევად, თუმცა ოპოზიციური პარტიების შეთანხმება სულ რაღაც სამი თვის წინ შედგა.