"საკუთარი ექიმების დანიშნული წამლების მიღება თუ წამება ჰგონია ვინმეს, ჰკითხეთ თქვენს ლიდერს, მეგის ქარდავას და ზედმიწევნით გაჩვენებთ, რა იყო წამება", — ასე უპასუხა თბილისის მერმა, კახა კალაძემ საკრებულოს სხდომაზე ნაციონალური მოძრაობის წევრის, ზვიად კუპრავას კითხვას მიხეილ სააკაშვილის პატიმრობასთან დაკავშირებით.

"არავის სიამოვნებს ადამიანის დაჭერა-დაკავება და მისი საპატიმროში ყოფნა, ვინც არ უნდა იყოს ის. რა თქმა უნდა, ადამიანურად ეს სასიამოვნო არაა, მაგრამ როდესაც შენ გაქვს დანაშაული ჩადენილი, შექმენი ის სისხლიანი მმართველობა, ბოროტება, რომელიც იყო უმძიმესი ჩვენი ქვეყნის მოსახლეობისთვის, ამაზე პასუხი უნდა აგო.

ზოგადად, ჩვენ თუ გვინდა ვიცხოვროთ და ავაშენოთ სამართლიანი სახელმწიფო, განურჩევლად თანამდებობისა, ყველა დამნაშავემ უნდა აგოს პასუხი. მიხეილ სააკაშვილს კონკრეტულ საქმეებზე ბრალი აქვს წაყენებული და სასჯელი უნდა მოიხადოს [...] თქვენ ხართ კოლექტიური მეგის ქარდავები. ეს არის სამწუხარო რეალობა", — განაცხადა კალაძემ.

დღეს თბილისის საკრებულოში სხდომა იმართება, რომელზეც თბილისის მუნიციპალიტეტის მთავრობის — მერის მოადგილეების, საქალაქო სამსახურების ხელმძღვანელებისა და გამგებლების დამტკიცების საკითხზე მსჯელობენ. სხდომა ხმაურის ფონზე მიმდინარეობდა, პარალელურად, გაიმართა აქციაც.

ამავე თემაზე: