თბილისის საკრებულოს სხდომა, რომელზეც თბილისის მთავრობა უნდა დაამტკიცონ ხმაურისა და კამათის ფონზე მიმდინარეობს. ერთ-ერთი ასეთი კამათის დროს საკრებულოს თავმჯდომარემ, გიორგი ტყემალაძემ, სავარაუდოდ, ტექნიკურ ჯგუფს უთხრა, რომ როდესაც ის ისაუბრებს, მიკროფონს ხმას აუწიონ. ამავდროულად მოითხოვა ისიც, რომ სხვისი გამოსვლის დროს ხმას ისევ ჩაუწიონ.

მანამდე ტყემალაძემ რამდენჯერმე სცადა ხმაური გადაეფარა და იმეორებდა ფრაზას "ერთი წუთით", თუმცა უშედეგოდ.

"მე როცა ვსაუბრობ ცოტა აუწიეთ ხოლმე რა [მიკროფონს] და მერე იმათზე დაუწიე", — თქვა ტყემალაძემ.

ამას წინ უძღოდა ის, რომ ენმ-ს წევრი, ირაკლი ნადირაძე მერს, კახა კალაძეს შესაძლო კორუფციულ გარიგებებზე უსვამდა კითხვას, როდესაც ტყემალაძემ თქვა, რომ შეფასებების დრო მოგვიანებით იქნება და ახლა ნადირაძემ კითხვები უნდა დასვას.

"ჩვენ გვაქვს საუკეთესო მოცემულობა, ლევან ხაბეიშვილი, რომელიც იყო საკრებულოს #1 ჯამბაზი, ასე იყო წოდებული, ჩაანაცვლა ირაკლი ნადირაძემ, ამიტომ მივცეთ იმის შესაძლებლობა, რომ გავერთოთ", — თქვა კალაძემ.

ამის შემდეგ ნადირაძეს დრო მისცეს და კითხვა დასვა, დასრულებისას კი კალაძემ თქვა: "დაჯექი ირაკლი, ორიანი". პასუხად ნადირაძემ უთხრა: "შე მართლა ოროსანო" და ისევ დაიწყო კამათი.

ტყემალაძემ საკრებულოს წევრებს უთხრა, რომ მიკროფონს გაუთიშავს ყველას, ვინც კითხვის დასმის დროს შეფასებებისთვის გამოიყენებს. მისი თქმით, შეფასებების საშუალება საკრებულოს დეპუტატებს ფრაქციის დროს ექნებათ.