მანამ, სანამ სამყარო ტომ ჰოლანდის ადამიანი ობობას ტრილოგიის ფინალური ფილმის — Spider-Man: No Way Home-ის მოლოდინშია, ანიმაციურ სამყაროში დიდი სიახლეებია: მაილს მორალესის ადამიანი ობობა ახალი ფილმით ბრუნდება!

Spider-Man: Across the Spider-Verse — ასე ჰქვია მულტისამყაროში ადამიანი ობობას ახალ ანიმაციურ თავგადასავალს, რომელიც ორი ნაწილისგან შედგება. პირველი ნაწილის პრემიერა 2022 წლის 7 ოქტომბერსაა დაგეგმილი.

Spider-Man: Into the Spider-Verse-მა მაყურებლებს წარუდგინა საერთო მულტისამყარო, რომელსაც "Spider-Verse" ეწოდება და რომელშიც მაილს მორალესი ხდება ახალი ადამიანი-ობობა და უერთდება განსხვავებული განზომილებებიდან გადმოსულ სხვა ადამიან-ობობებს, რათა ერთიანად დაიცვან ნიუ-იორკი კინგპინისგან. ახალ ფილმში მაილსი სხვა განზომილების ადამიან-ობობას — გვენს კიდევ ერთხელ ხვდება.

იმის გათვალისწინებით, თუ როგორი ნოვატორული ტაქტიკები გამოიყენეს პირველი Spider-Verse-ის შექმნისას — კომპიუტერულად გენერირებული სურათებისა და ხელით დახატული ანიმაციის შერწყმით მიღებული სრულიად უნიკალური მთლიანობა — გასაკვირი არაა, რომ ახალი ტრეილერი შთამბეჭდავ და გასაოცარ სანახაობას გვპირდება.

მაილს მორალესის პირველი ანიმაციური ფილმი სუპერგმირების შესახებ შექმნილ ნამუშევრებს შორის მართლაც ერთ-ერთი ყველაზე წარმატებული და შთამბეჭდავია. მან Sony-ს შემოსავლის სახით $375,5 მილიონი და საუკეთესო ანიმაციური ფილმების კატეგორიაში პირველი ოსკარი მოუტანა.