სანზონაში 15 წლის მოზარდის მკვლელობის საქმეზე ორი არასრულწლოვანი დააკავეს. ამის შესახებ ინფორმაცია შინაგან საქმეთა სამინისტრომ გაავრცელა.

უწყების ცნობით, ერთ-ერთი, 2005 წელს დაბადებული ლ.ი წინასწარი შეცნობით არასრულწლოვნის მიმართ დამამძიმებელ გარემოებაში ჩადენილი განზრახ მკვლელობის ბრალდებითაა დაკავებული, ხოლო 2004 წელს დაბადებულ პ.ვ.-ს განსაკუთრებით მძიმე დანაშაულის შეუტყობინებლობას ედავებიან.

შსს-ს ინფორმაციით, გამოძიებით დადგინდა, რომ ბრალდებულმა 2006 წელს დაბადებულ დ.კ-ს ჭრილობა ცივი იარაღით მიაყენა და შემთხვევის ადგილიდან მიიმალა. უწყების განცხადებით, მასთან ერთად შემთხვევის ადგილიდან მიიმალა მეორე ბრალდებული პ.ვ. რომელიც შეესწრო განსაკუთრებით მძიმე დანაშაულს და არ შეატყობინა სამართალდამცავ უწყებებს.

მათი განცხადებით, გამოძიება სისხლის სამართლის კოდექსის 109-ე მუხლის მე-2 ნაწილის "ბ" ქვეპუნქტით და 376-ე მუხლის მე- 3 ნაწილით მიმდინარეობს, რაც წინასწარი შეცნობით, არასრულწლოვნის მიმართ დამამძიმებელ გარემოებაში ჩადენილ განზრახ მკვლელობასა და განსაკუთრებით მძიმე დანაშაულის შეუტყობინებლობას გულისხმობს.

სანზონაში მოზარდი გუშინ, 4 დეკემბერს მოკლეს. შსს-ს ცნობით, მიყენებული დაზიანების შედეგად ის საავადმყოფოში გარდაიცვალა.