ნაციონალური მოძრაობისა და ლელოს აჭარის ორგანიზაციის ლიდერებმა სპეციალური ბრიფინგი გამართეს და ნუგზარ ფუტკარაძის საქმესთან დაკავშირებით პარტნიორი ქვეყნების ელჩებთან, საერთაშორისო ორგანიზების ხელმძღვანელებთან და სახალხო დამცველთან შეხვედრა დააანონსეს. ბათუმის მერობის ყოფილი კანდიდატი, გიორგი კირთაძე ამბობს, მათ მიერ გასაჯაროებული მტკიცებულებების მიუხედავად, სამართალდამცავ უწყებებს ჯერ კიდევ არ დაუკითხავთ საქმეში მონაწილე პირები.

"მივიღეთ გადაწყვეტილება, ჩვენი ჯგუფი მომავალი კვირიდან ჩავალთ აუცილებლად თბილისში და ვითხოვთ შეხვედრას ყველა ჩვენი მეგობარი ქვეყნის ელჩთან, საერთაშორისო ორგანიზაციების ხელმძღვანელებთან და სახალხო დამცველთან, რათა დოკუმენტურად, პირადად ავუხსნათ რა წარმოუდგენელი ამბები ხდება ჩვენს ქალაქში", — განაცხადა კირთაძემ.

ის ამბობს, რომ მათ სურთ საერთაშორისო პარტნიორებსა და სახალხო დამცველს პირადად მიაწოდონ მტკიცებულებები და აუხსნან ფაქტები, რაც ნუგზარ ფუტკარაძის გარდაცვალების საქმეში აჭარის მთავრობის თავმჯდომარის, თორნიკე რიჟვაძის მამის, დავით რიჟვაძის ბრალეულობას ადასტურებს.

ბათუმის ახალი მოწვევის საკრებულოს დეპუტატი პარტია ლელოდან, ირაკლი კუპრაძე აცხადებს, რომ აჭარაში ქართულ ოცნებას "მიტაცებული აქვს" ხელისუფლება.

"აჭარის მთავრობის თავმჯდომარე, თორნიკე რიჟვაძე; მთავარი ძალოვანი რეგიონის მისი მამა, დავით რიჟვაძე; ცენტრალური [უმაღლესი] საარჩევნო კომისიის ხელმძღვანელი, თორნიკე რიჟვაძის მეჯვარე, ქალაქის მერი, რომელიც არის დასმული პოზიციაზე, ასევე მისი მეჯვარე — ეს არის ხელისუფლების მიტაცების უპრეცედენტო შემთხვევა", — აცხადებს კუპრაძე.

ნაციონალური მოძრაობის აჭარის ორგანიზაციის ერთ-ერთი ლიდერი, მირდატ ქამადაძე ამბობს, მიუხედავად გამოძიების დაწყებისა, ის არასწორი მიმართულებით მიმდინარეობს.

"მარტო აუდიო ჩანაწერები, სხვა მტკიცებულებებს რომ თავი დავანებოთ, საკმარისია იმისითვის, რომ გამოძიება დაიწყოს ქრთამის მიცემის [მუხლით] ან ზეგავლენით ვაჭრობით, მაგრამ ამ მიმართულებითაც არავითარი ნაბიჯი არ გადადგმულა", — ამბობს ქამადაძე.

• თუ რაიმე აქვთ, რას ელოდებოდნენ ამ ბატონის გარდაცვალებას, მანამდე რატომ არ წარადგინეს? — ღუდუშაური ფუტკარაძეზე

ბათუმის საკრებულოს მაჟორიტარი დეპუტატი ენმ-დან, ნუგზარ ფუტკარაძე 18 ნოემბერს გარდაიცვალა. 24 ნოემბერს პარტიამ სპეციალური ბრიფინგი გამართა და მის გარდაცვალებაში ქართული ოცნება დაადანაშაულა. კერძოდ, ენმ-ში აცხადებენ, რომ ფუტკარაძეზე აჭარის მთავრობის თავმჯდომარის, თორნიკე რიჟვაძის მამა, ძალოვანი უწყეის მოქმედი მაღალჩინოსანი, დავით რიჟვაძე ზეწოლას ახდენდა. აღსანიშნავია, რომ ენმ დავით რიჟვაძეს ოპოზიციონერი წევრების მუქარაში იქამდეც ადანაშაულებდა.

ენმ-მ ბრიფინგზე ჩანაწერები გაასაჯაროვა, რომელშიც, მათი თქმით, ფუტკარაძის, თაბაგიძისა და ბაკურიძის საუბარია ასახული. ჩანაწერები On.ge-ს პარტიიდან მიაწოდეს და მათში ისმის, რომ, სავარაუდოდ, ოპოზიციის წევრს ჩვენთვის უცხო პირები "ნეიტრალურობას" სთხოვენ — ის ამბობს, რომ ვერ გააკეთებს განცხადებას ნაციონალური მოძრაობის დატოვებაზე და სხვა ოპოზიციაში ვერ გადავა. პასუხად, კი იღებს, რომ სხვა ოპოზიციაში კი არა, "ნეიტრალურში გადავიდეს".

ნუგზარ ფუტკარაძის გარდაცვალების საქმეზე გამოძიება სისხლის სამართლის კოდექსის 116-ე მუხლის 1-ლი ნაწილით მიმდინარეობს, რაც გაუფრთხილებლობით სიცოცხლის მოსპობას გულისხმობს.