"ციხე არ არის კურორტი" — ასე ეხმაურება ქართული ოცნების პოლიტსაბჭოს წევრი, სოზარ სუბარი ექსპრეზიდენტ მიხეილ სააკაშვილის მოთხოვნას, მისი მონახულების უფლება მისცენ დეპუტატებს. სუბარის თქმით, გორის ჰოსპიტალში სააკაშვილის სანახავად "საკმარისზე მეტი" ადამიანი შედის.

"მე მგონი, საქართველოში კი არა, მსოფლიოში არ არსებობს პატიმარი, რომელსაც ორი თვის განმავლობაში იმდენი მნახველი ჰყოლოდა, რამდენიც ჰყავდა სააკაშვილს. ციხე არ არის კურორტი. საკმარისად ბევრი ადამიანი შედის, საკმარისზე მეტიც.

გაიხსენოს ის ადამიანები, რომლებსაც მისი პრეზიდენტობის პერიოდში ციხეში მყოფს, ძალიან ბევრ უდანაშაულოს მათ შორის წლების განმავლობაში ერთი ადამიანის ნახვის საშუალება არ ჰქონდა", — განაცხადა სოზარ სუბარმა.

დღეს, სააკაშვილის ადვოკატმა, ბექა ბასილაიამ განცხადა, რომ დეპუტატებს ექსპრეზიდენტთან შესვლის შესაძლებლობას არ აძლევენ. ადვოკატის შეფასებით, ამის სამართლებრივი წინაპირობაც არ არსებობს. მან თქვა, რომ თუ ასე გაგრძელდა, მიხეილ სააკაშვილი მკურნალობის პროცესზე უარს იტყვის.

ექსპრეზიდენტის პირადი ექიმის, ნიკოლოზ ყიფშიძის შეფასებით, ექსპრეზიდენტის მიერ მკურნალობის შეწყვეტა კატასტროფა იქნება. ის განმარტავს, რომ ასეთ შემთხვევაში მთელი მკურნალობის პროცესის თავიდან დაწყება გახდება საჭირო.