კომუნიკაციების მარეგულირებელმა ეროვნულმა კომისიამ იმედი და სტუდია მაესტრო 2 500-2 500 ლარით დააჯარიმა. მიზეზად უწყება ასახელებს იმას, რომ წინასაარჩევნო პერიოდში ტელევიზიებმა მაყურებელს არ შესთავაზეს საარჩევნო სუბიექტთა დებატები. გარდა ამისა, კომისიამ გაფრთხილება მისცა ტელეკომპანია ქართულ არხს, რომელმაც, მათივე განმარტებით, არა თუ წინასაარჩევნო დებატები, არამედ ზოგადად, პოლიტიკური გადაცემები არ გაუშვა.

კომისიის ინფორმაციით, ქართული არხის შემთხვევაში მხოლოდ გაფრთხილებით იმიტომ შემოიფარგლნენ, რომ მას ბოლო ერთი წლის განმავლობაში მაუწყებლის შესახებ კანონი არ დაურღვევია. რაც შეეხება იმედსა და მაესტროს, ისინი აღნიშნული კანონის დარღვევისთვის უკვე იყვნენ გაფრთხილებულები.

"მაუწყებლობის შესახებ საქართველოს კანონის მიხედვით, საერთო მაუწყებელი ვალდებულია საარჩევნო კამპანიის დროს გადასცეს წინასაარჩევნო დებატები და არადისკრიმინაციულად უზრუნველყოს ყველა კვალიფიციური საარჩევნო სუბიექტის თანაბარი მონაწილეობა წინასაარჩევნო დებატებში, რათა მოხდეს მაყურებლის ინფორმირება", — განმარტავენ კომისიაში.

დღევანდელ სხდომაზე კომუნიკაციების კომისიამ მთავარი არხიც დააჯარიმა. არხის გენერალური დირექტორი, ნიკა გვარამია ამას სპეციალური ბრიფინგით გამოეხმაურა და განაცხადა, რომ კომისიის გადაწყვეტილებას სასამართლოში გაასაჩივრებს. მან კომუნიკაციის კომისიის თავმჯდომარესა, კახა ბექაურსა და წევრებს, ვახტანგ აბაშიძესა და ეკატერინე იმედაძეს "ივანიშვილის პირადი ცენზორები და თავისუფალი სიტყვის ჯალათები" უწოდა.