თბილისის მერის, კახა კალაძის განცხადებით, თბილისის მთავრობას უფლებამოსილება შეუჩერდა და სწორედ ამიტომ დღევანდელი მთავრობის სხდომა არ ჩატარდა. მისივე სთქმით, სულ მალე საკრებულოს ახალ გუნდს წარუდგენს, რომელშიც, როგორც ძველი, ასევე, ახალი სახეები მოხვდებიან.

"4-წლიანი ვადა, რომელიც 2017 წელს თქვენ, თბილისელებმა მოგვანიჭეთ, ამოიწურა. სულ მალე საკრებულოს წარვუდგენ ჩვენს გუნდს, რომლის წევრების უმეტესობას თვენ კარგად იცნობთ, თუმცა მთავრობის შემადგენლობა, ასევე, იქნება განახლებული. ასე რომ, ახალი ვადით და სრული უფლებამოსილებით დედაქალაქის მთავრობა მალე ისევ ჩაუდგება თბილისის სამსახურში მუშაობას და მზად ვართ 24-საათიანი შრომით შევასრულოთ ყველა დაპირება და ღირსეულად ვუპასუხოთ თბილისელების მიერ გამოცხადებულ ნდობას", — განაცხადა მან.

კალაძემ კიდევ ერთხელ აღნიშნა, რომ ის ყველა თბილისელის მერია, მათ შორის იმ ადამიანების, ვინც მას მხარი არ დაუჭირა. მისივე თქმით, ამაყია იმით, რაც თბილისის მთავრობამ 4 წლის განმავლობაში გააკეთა და ეს ყველაფერი ქალაქს დაეტყო.