მიხეილ სააკაშვილის ადვოკატი დიმიტრი საძაგლიშვილი აცხადებს, რომ "ნორმალურ ქვეყანაში" სააკაშვილს თავისუფალ გარემოში მკურნალობის საშუალებას მისცემდნენ. ადვოკატი ამბობს, რომ სააკაშვილის "წამებისა და არაადამიანური მოპყრობის" შემდეგ ეს ლოგიკური მოთხოვნაა.

"არ უნდა დაგვავიწყდეს, რომ მიხეილ სააკაშვილი გახდა წამების და არაადამიანური მოპყრობის მსხვერპლი, რაც, ბუნებრივია, უკვალოდ ვერ ჩაივლის მის ჯანმრთელობაზე, მორალურ მხარეზე. აი, ამ ყველაფრის გათვალისწინებით, პირველ რიგში, ცხადია, რომ მიხეილ სააკაშვილი არის პოლიტიკური პატიმარი და პირდაპირი მტკიცებულება გვაქვს ჩვენ ირაკლი ღარიბაშვილის განცხადებების სახით. ამას რომ თავი დავანებოთ, ნორმალურ ქვეყანაში წამების და არაადამიანური მოპყრობის შემდეგ ადამიანს მისცემდნენ თავისუფალ მდგომაროებაში მკურნალობის საშულებას და არა იმ მდგომარეობაში, რაშიც ახლა საქართველოს მე-3 პრეზიდენტი იმყოფება", — განაცხადა საძაგლიშვილმა.

სააკაშვილისთვის სასჯელის გადავადების ინიციატივით, თავდაპირველად მისი პირადი ექიმი, ნიკოლოზ ყიფშიძე გამოვიდა. 20 ნოემბერს, გორის სამხედრო ჰოსპიტალში ექსპრეზიდენტის მონახულების შემდეგ ყიფშიძემ განაცხადა, რომ ისურვებდა სააკაშვილისთვის ციხის გარეთ, თავისუფალი მკურნალობის საშუალება მიეცათ. მან აღნიშნა, რომ ეს განცხადება სააკაშვილთან არ შეუთანხმებია.

ყიფშიძის ინიციატივას გამოეხმაურა სახალხო დამცველის ინიციატივით შემქნილი სამედიცინო ექსპერტთა ჯგუფის წევრი, კარდიოლოგი გიორგი პაპიაშვილი. მისი თქმით, სააკაშვილის თავისუფალ გარემოში მკურნალობის სამედიცინო საფუძველი არ არსებობს.

პაპიაშვილის საპასუხოდ, ყიფშიძემ განაცხადა, რომ მის მიერ გამოთქმული იდეა კატეგორიული არაა, თუმცა მზადაა, ამ საკითხზე ყველას ესაუბროს. ყიფშიძე ამბობს, რომ საჭიროების შემთხვევაში, საკითხის გადასაწყვეტად, შესაძლოა, უცხოელი სპეციალისტები მოიწვიონ.