ნაციონალური მოძრაობის წევრის, ეკა ხერხეულიძის განცხადებით, ექსპრეზიდენტ მიხეილ სააკაშვილს სურს, რომ სამხედრო ჰოსპიტალში მისი გადაყვანის საკითხი ადვოკატ ნიკა გვარამიასა და უკრაინის კონსულთან შეთანხმებით მოხდეს. მისივე თქმით, სააკაშვილი თანმხლები პირების შესახებაც მას ყოველი შეხვედრისას აფრთხილებდა.

"როგორც ვვარაუდობდი და როგორც გაფრთხილებული ვიყავი მიხეილ სააკაშვილის მხრიდან, ის თავისი ნებით ამ შენობიდან არ გავიდოდა, ვთქვათ, ჩემი აქ ყოფნის გარეშე. ასევე, მან ახლა მოსთხოვა ადმინისტრაციას, რომ ნიკა გვარამია და უკრაინის კონსული მობრძანდნენ აქ იმისთვის, რომ მისი გადაყვანა მათთან შეთანხმებით მოხდეს. რაც მოგახსენეთ, რომ მიხეილ სააკაშვილი აქედან არ გავიდოდა და ძალიან მნიშვნელოვანი დრო იკარგება სანამ ისინი არ მოვლენ და ჩვენთან ერთად არ გადაწყდება ეს საკითხი, არცერთ შემთხვევაში ის არ გადავა აქედან... მან ჩემთან შეხვედრის დროს ბრძანა, რომ ყოფილიყო ადვოკატი. სასურველი იქნებოდა რომ ვყოფილიყავი მე, პირადი ექიმი და უკრაინის კონსული", — განაცხადა ხერხეულიძემ.

ახლა ყველა ელოდება რა გადაწყვეტილებას მიიღებს ექსპრეზიდენტი, შეწყვეტს თუ არა შიმშილობას და გადავა თუ არა გორის სამხედრო ჰოსპიტალში.

დღეს, 19 ნოემბერს იუსტიციის მინისტრმა სპეციალურ ბრიფინგზე ექსპრეზიდენტს გორის ჰოსპიტალში გადაყვანა შესთავაზა. მისი მტკიცებით, გორის ჰოსპიტალი არის ადგილი, სადაც მიხეილ სააკაშვილის ჯანმრთელობა და უსაფრთხოება მაქსიმალურად იქნება დაცული. ჟურნალისტების კითხვას, როდის და როგორ გადაიყვანენ სააკაშვილს, ბრეგაძე პასუხობს, რომ ეს პროცედურა დაიგეგმება ექიმებთან და უსაფრთხოების თანამშრომლებთან ერთად, როდესაც მის მიერ იქნება მიღებული გადაწყვეტილება, რომ იგი თანახმაა, გადავიდეს გორის სამხედრო ჰოსპიტალში და შეწყვიტოს შიმშილობა.

აღსანიშნავია, რომ მიხეილ სააკაშვილი გორის ჰოსპიტალს საფრთხედ მიიჩნევს. ამაზე ის 11 ნოემბერს გამოქვეყნებულ წერილში წერდა. საფრთხის მიზეზად ის რამდენიმე კილომეტრში საოკუპაციო ხაზისა და სპეცდანიშნულების დანაყოფები ყოფნას ასახელებს.

პირველ ნოემბერს, მიხეილ სააკაშვილის ადვოკატმა, ნიკა გვარამიამ განაცხადა, რომ სააკაშვილის გორის ჰოსპიტალში გადაყვანა, შემდეგ კი "ოსური სპეცრაზმის" მიერ მისი გატაცება იგეგმებოდა.

რაც შეეხება ჰოსპიტალთან აქციების არგამართვის მოთხოვნას, ამის პირობა ოპოზიციამ ჯერ კიდევ რამდენიმე დღის წინ დადო და თქვა, რომ თუ სააკაშვილს სამოქალაქო კლინიკაში გადაიყვანენ, იქ აქციები არ გაიმართება.

გაიგე მეტი: