ნაციონალური მოძრაობის ერთ-ერთი ლიდერი, ხატია დეკანოიძე აცხადებს, რომ გონების დაკარგვის შემდეგ სააკაშვილის გადარჩენა მოახერხა რეანიმატოლოგმა, რომელიც ციხის საავადმყოფოში შემთხვევით იმყოფებოდა. ეს განცხადება დეკანოიძემ სააკაშვილის რეანიმაციაში მონახულების შემდეგ გააკეთა.

"იგი არის ცუდად, პირდაპირ რომ გითხრათ. რომ არ ყოფილიყო რეანიმატოლოგი შემთხვევით, რომელიც იყო სასჯელაღსრულების დაწესებულებაში დღეს, ეს ადამიანი რომ არ ყოფილიყო, მისი გადარჩენა, პრაქტიკულად, იქნებოდა შეუძლებელი [...]

შემდეგ ასეთ დარტყმას, შემდეგ ასეთ კოლაფსში ჩავარდნას მიხეილ სააკაშვილი ვერ გადაიტანს. მხოლოდ და მხოლოდ გადარჩა იმიტომ, რომ ეს ადამიანი იმყოფებოდა და გაუწია ის დახმარება, რომელიც იყო აუცილებელი პირველადი დახმარება", — განაცხადა დეკანოიძემ.

მისი ინფორმაციით, სააკაშვილმა თქვა, რომ გონება ცხოვრებაში პირველად დაკარგა. დეკანოიძე რეანიმატოლოგზე დაყრდნობით ამბობს, რომ გონების დაკარგვა საკმაოდ დიდხანს გაგრძელდა.

დღეს ციხის საავადმყოფოში რესპუბლიკური საავადმყოფოს კრიტიკული მედიცინის დეპარტამენტს ხელმძღვანელი, გულიკო ქილიფთარი იმყოფებოდა. ის ამბობს, რომ დაწესებულებაში საკონსულტაციოდ მიიწვიეს და მისი მისვლა დაემთხვა ექსპრეზიდენტის გონების დაკარგვას. ქილიფთარი ხაზს უსვამს, რომ რეანიმატოლოგი მიხეილ სააკაშვილთან ყოველ დღე მორიგეობს.

დღეს ექსპრეზიდენტის ადვოკატმა, ბექა ბასილაიამ მე-18 დაწესებულებიდან გამოსვლის შემდეგ განაცხადა, რომ სააკაშვილი ოთახიდან გასვლისას "მოსხლეტით წაიქცა და გადააწვინეს საწოლზე", ამასთან მან თქვა, რომ ხელით გაუხსნეს თვალები. ამის შემდეგ პენიტენციურმა გაავრცელა განცხადება და თქვა, რომ სააკაშვილის მდგომარეობა სტაბილურია და "ცოტა ხანში ექიმი რეანიმატოლოგი გააკეთებს კომენტარს მედიისთვის". რეანიმატოლოგმა კი თქვა, რომ ექსპრეზიდენტი რეანიმაციაშია. მისივე თქმით, პაციენტმა მცირე ხნით გონება დაკარგა. ასევე, ჰქონდა მაღალი წნევა და ახლა "აბსოლუტურად სტაბილურ" მდგომარეობაშია.