ადამიანი ობობას შესახებ მარველის ახალი ფილმის — Spider-Man: No Way Home-ის გამოსვლამდე სულ ცოტა დრო რჩება. კინოთეატრებში ფილმის პრემიერა 17 დეკემბერსაა დაგეგმილი. როგორც ახალი ტრეილერიდან შევიტყვეთ, ადამიან ობობასა და მის მეგობრებს მულტისამყაროსთან და მის ბოროტმოქმედებთან შერკინება მოუწევთ. აღნიშნული დეტალი შესაძლოა, ადამიანი ობობას შესახებ ახალი ფილმების გამოსვლასაც გულისხმობდეს, თუმცა ამ ეტაპზე ტომ ჰოლანდს პიტერ პარკერთან დაკავშირებით კონკრეტული სამომავლო გეგმები არ აქვს.

ადამიანი ობობას ახალ ფილმებსა და ტომ ჰოლანდის გეგმებზე ჯერჯერობით კონკრეტული არაფერი ვიცით, თუმცა როგორც ჩანს, თავად ტომს ურჩევნია, საყვარელი გმირი უკან მოიტოვოს და ახალ პროექტებში ჩაერთოს. ამის შესახებ მან გამოცემა GQ-სთან ინტერვიუში ისაუბრა.

"იქნებ დროა, გზა გავაგრძელო. შესაძლოა, ადამიანი ობობასთვის საუკეთესო მაილს მორალესის შესახებ ფილმის გადაღება იყოს. მე პიტერ პარკერიც უნდა გავითვალისწინო, რადგან ის ჩემი ცხოვრების მნიშვნელოვანი ნაწილია. თუ 30 წელს გადაცილებულიც ადამიან ობობას ვითამაშებ, რაღაც შემშლია ", — ამბობს ტომ ჰოლანდი.

მაილსი მაყურებლებმა ტელეეკრანებზე პირველად ანიმაციური ფილმით Spider-Man: Into the Spider-Verse იხილეს. ფილმი სუპერგმირების შესახებ ბოლო ათწლეულში შექმნილ ერთ-ერთ საუკეთესო ნამუშევრად ითვლება და საუკეთესო ანიმაციური ფილმის კატეგორიაში ოსკარიც კი აქვს მოპოვებული. Spider-Man: No Way Home-ში მულტისამყაროს დადასტურების შემდეგ გულშემატკივრებს ფილმში მაილსის გამოჩენის იმედიც ჰქონდათ, თუმცა ამის შესახებ მარველს ინფორმაცია არ გაუვრცელებია.

"მთელი დარჩენილი ცხოვრება მსახიობობა ნამდვილად არ მინდა. შეიძლება, დურგალი გავხდე. ძალიან ხელმარჯვე ვარ. თუ რაღაც გატეხილია, მის შეკეთებას ყოველთვის ვახერხებ", — ამბობს ტომ ჰოლანდი.

მსახიობის ერთ-ერთი ოცნება სახლების ყიდვა და მათი დაბალ ფასში გაქირავებაა მხოლოდ იმიტომ, რომ დამატებითი შემოსავლის წყარო არ სჭირდება.

მიუხედავად იმისა, რომ ტომ ჰოლანდი პიტერ პარკერის შემდეგ ცხოვრებაზე ალაპარაკდა, აშკარაა, რომ Sony და მარველი მას მარტივად ნამდვილად არ დათმობენ:

"მას კიდევ 100 ფილმის გადაღებაზე ველაპარაკე. მის გარეშე ადამიანი ობობას ფილმს არ გადავიღებ, მეხუმრებით?!", — განაცხადა Sony-ის წარმომადგენელმა და ადამიანი ობობას პროდიუსერმა ემი პასკალმა.

მანამ, სანამ ტომ ჰოლანდი დურგლობას საბოლოოდ გადაწყვეტდეს, ნახეთ Spider-Man: No Way Home-ის ახალი ტრეილერი:

ამავე თემაზე: