დეპუტატი ვიქტორ ჯაფარიძე ამტკიცებს, რომ ნინო ლომჯარია "ნაციონალების დამცველია". ასე უპასუხა მან ექსპრეზიდენტ მიხეილ სააკაშვილის ჯანმრთელობის მონიტორინგისთვის სახალხო დამცველის მიერ სამედიცინო ექსპერტთა ჯგუფის შექმნის შესახებ დასმულ კითხვას.

"ნაციონალების დამცველია ის, სახალხო დამცველი არ არის", — განაცხადა ჯაფარიძემ.

კითხვას, რატომ არ ენდობა ის სახლახო დამცველის მიერ შექმნილ კონსილიუმის დასკვნას, დეპუტატმა ასე უპასუხა:

"მამიდაშვილ-ბიძაშვილები ჰყავთ [წევრებად] და იმიტომ".

სამედიცინო ექსპერტთა ჯგუფის "სახალხო დამცველის ნათესავებით დაკომპლექტებაზე" გაამახვილა ყურადღება ქართული ოცნების კიდევ ერთმა დეპუტატმა, ირმა ზავრადაშვილმა. ის ამბობს, რომ არ ენდობა კონსილიუმის დასკვნას.

მიხეილ სააკაშვილი 49-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

17 ნოემბერს, სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი წარადგინა. კონსილიუმი ციხის საავადმყოფოში იმავე დღეს შევიდა და ადგილზე მდგომარეობას 4 საათზე მეტი ხნის განმავლობაში შეისწავლიდა. მეორე დღეს მათ გამოაქვეყნეს დასკვნა, რომლის მიხედვითაც მიხეილ სააკაშვილის მდგომარეობა კრიტიკულია. ექიმების განცხადებით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

გაიგე მეტი: