ლიეტუვა საქართველოს Pfizer-ის ვაქცინის 50 000 დოზას ჩუქნის. ამის შესახებ განცხადება ლიეტუვას მთავრობამ ოფიციალურ Twitter-ზე გაავრცელა.

"ლიეტუვა აგრძელებს ვაქცინის მიწოდებას მათთვის, ვისაც სჭირდება. მხოლოდ ერთიანობა და სოლიდარობა დაგვეხმარება პანდემიის სწრაფად დამარცხებაში", — აღნიშნულია განცხადებაში.

9 ნოემბერს საქართველოში ბუსტერ დოზის გაკეთება 18 წლის ზემოთ ყველა პირისთვის დასაშვები გახდა. იმავე დღეს იმუნიზაციის საბჭომ 12-დან 15 წლამდე ასაკის ბავშვებში Pfizer-ის ვაქცინა დაუშვა.

გარდა ამისა, 8 ნოემბერს საკოორდინაციო საბჭომ მიიღო გადაწყვეტილება, რომ პირველი დეკემბრიდან ე.წ. მწვანე პასპორტები ამოქმედდეს. როგორც პრემიერმინისტრმა, ირაკლი ღარიბაშვილმა ბრიფინგზე ისაუბრა, დეკემბრიდან მოქალაქეები კონკრეტულ დაწესებულებებში მწვანე პასპორტების გარეშე ვეღარ შევლენ, თუმცა ეს გავრცელდება დაწესებულებების სტუმრებზე და არა იქ მომუშავე პერსონალზე.

საქართველოში ამ დროისთვის 3 სხვადასხვა ვაქცინაა ხელმისაწვდომი. უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.