ქართულ-ჰოლანდიური კლინიკის ექიმის განცხადებით, ოკუპირებული ტერიტორიიდან გადმოყვანილი, საოკუპაციო ძალების მიერ უკანონოდ დაკავებული გენადი ბესტაევის ჯანმრთელობის მდგომარეობა კრიტიკულია და ის მართვით სუნთქვაზე იმყოფება.

"პაციენტი გამოყვანილია საოპერაციო ბლოკიდან, ჩაუტარდა თავის ტვინის დეკომპრესიული ტრეპანაცია, ჰემატომის ევაკუაცია, მისი მდგომარეობა არის საკმაოდ მძიმე, რა თქმა უნდა, მართვით სუნთქვაზეა, არასტაბილური ჰემოდინამიკით. ჯერჯერობით, კრიტიკულია მდგომარეობა, სიტუაციიდან და ზოგადად, მდგომარეობიდან გამომდინარე, გააგრძელებს რეანიმაციულ განყოფილებაში მკურნალობას", — განაცხადა მან.

ბესტაევის საქართველოს კონტროლირებად ტერიტორიაზე გადმოყვანის შესახებ ინფორმაცია გუშინ გავრცელდა. სუს-ის ცნობით 15 ნოემბერს ოკუპირებული ცხინვალის ე.წ. ციხეში ბესტაევს ინსულტი განუვითარდა. ქართულმა მხარემ ჟენევის თანათავმჯდომარეებსა და ევროკავშირის სადამკვირვებლო მისიასთან ერთად ბესტაევის მის მიერ კონტროლირებად ტერიტორიაზე გადმოყვანა მოითხოვა.

გენადი ბესატაევი საოკუპაციო ძალებმა 2019 წლის 21 ნოემბერს უკანონოდ დააკავეს. მიმდინარე წლის 2 მარტს ოკუპირებული ცხინვალის ე.წ. სასამართლომ მას 3 წლით უკანონო პატიმრობა მიუსაჯა.