ქართული ოცნების დეპუტატის, ირაკლი კობახიძის განცხადებით, ოპოზიცია ხალხს ვეღარ აგროვებს და ახლა ცდილობს ისეთ ფორმას მიმართოს, რომელსაც "ხალხის შეგროვება აღარ სჭირდება". ამის შესახებ მან პარლამენტში ჟურნალისტებთან ისაუბრა.

"პირველი — არავითარი კრიზისი არ არსებობს, ისევე, როგორც არ არსებობდა თავის დროზე, ყველაფერი იყო ხელოვნური, ახლაც აბსოლუტურად ყველაფერი არის ხელოვნური და ამას ხელოვნურ კრიზისსაც ვერ დავარქმევთ. საზოგადოება ხედავს ყველაფერს, ისინი ხალხს ვეღარ აგროვებენ და ცდილობენ მიმართონ ისეთ ფორმას, რომელსაც აღარ სჭირდება ხალხის შეგროვება. ეს არის პოლიტიკური მხარე", — აცხადებს კობახიძე.

მან, ასევე, ისაუბრა მიხეილ სააკაშვილზე და განაცხადა, რომ მას შემდეგ, რაც ოპოზიცია მის სამოქალაქო კლინიკაში გადაყვანას ითხოვს, ამის აუცილებლობა არ დამდგარა. ის ამ მოთხოვნას "აბსურდს" უწოდებს .

"რაც შეეხება თვითონ მოთხოვნას, მოთხოვნა არის თავისთავად აბსურდული და უკვე არის სრული აბსურდის თეატრი, რასაც ჩვენ ვხედავთ. რაც შეეხება სამოქალაქო კლინიკაში გადაყვანას, ისე ცდილობენ წარმოაჩინონ, თითქოს ჩვენი, ხელისუფლების მხრიდან არის რაღაც ახირება მისი არგადაყვანა, სინამდვილეში ხდება რა — ორ კვირაზე მეტია ისინი ამ მოთხოვნას აყენებენ და ამ ორი კვირის განმავლობაში ამის არავითარი აუცილებლობა არ არსებობდა. რატომ უნდა ყოფილიყო სააკაშვილი ეს ორი კვირა და მეტი სამოქალაქო საავადმყოფოში აბსოლუტურად გაუგებარია, ეს არის აბსურდი", — ამბობს ის.

გარდა ამისა, კობახიძე ამტკიცებს, რომ სააკაშვილის სამოქალაქო კლინიკაში გადაყვანის რეალური მიზეზი ის არის, რომ ექსპრეზიდენტი "ციხიდან გაიყვანონ". მისი თქმით, "ამ ახირებას, ბუნებრივია", ვერ აჰყვებიან.

"მეორე, წარმოდგინეთ ამ ორი კვირის განმავლობაში რა იქნებოდა სამოქალაქო საავდმყოფოში და სამოქალაქო საავადმყოფოსთან. ერთი, რომ იქნებოდა ადამიანი, რომელიც უნდა იყოს ციხეში, ციხის გარეთ, გაუგებარი მიზეზით და თანასწორობა უნდა იყოს დაცული ყველას მიმართ და მეორე, მუდმივი რისკი, იქ საჭირო იქნებოდა სამართალდამცავი ორგანოების აბსოლუტურად არასაჭირო მობილიზაცია, მაშინ, როდესაც შეიძლება, რომ სხვანაირად განვითარდეს პროცესები, იქ მცდელობები და ასე შემდეგ. ეს ყველაფერი არის ერთადერთი მიზნით გამოცხადებული, მიზანი არის ის, რომ რამენაირად სააკაშვილი გაიყვანონ ციხიდან, ეს არის დღესავით ნათელი და ბუნებრივია, ამ ახირებას ჩვენ ვერ გავყვებით", — აღნიშნა მან.