ექსპრეზიდენტის ექიმის, ნიკოლოზ ყიფშიძის განცხადებით, მიხეილ სააკაშვილი ძალიან განაწყენებულია, რომ ვერ ნახა ევროპარლამენტარი ანა ფოტიგა.

"ქალბატონი ფოტიგა მე ვნახე დაახლოებით ორი დღის წინ და მოვახსენე მას, მოვუყევი ყველაფერი პრეზიდენტის მდგომარეობის შესახებ. მან კარგად იცის რა მდგომარეობაშია პრეზიდენტი, თუმცა, რა თქმა უნდა, სჯობდა თავისი თვალით ენახა", — ასე უპასუხა ყიფშიძემ კითხვას, იმის გამო ხომ არ უთხრეს ფოტიგას უარი, რომ სააკაშვილის მძიმე მდგომარეობა არ ენახა.

როგორც ყიფშიძემ აღნიშნა, სააკაშვილს ძლიერი სისუსტე აქვს და დღეს პირველი დღეა, როცა ის ფეხზე ვერ ადგა. მისივე თქმით, ტკივილები სააკაშვილს არ აქვს და კალიუმის მაჩვენებელი დაბალია. ყიფშიძე განმარტავს, რომ საკაშვილი შიმშილობას აგრძელებს. ის უკვე 44-ე დღეა შიმშილობს.

12 ნოემბერს საქართველოში ევროპარლამენტარი ანა ფოტიგა და ლიეტუველი პარლამენტარები ჩამოვიდნენ, მათი მიზანი ექსპრეზიდენტ მიხეილ სააკაშვილის ციხეში მონახულება იყო. ფოტიგა მოშიმშილე ელენე ხოშტარიას შეხვდა, თუმცა ორი დღის განმავლობაში ვერ შეძლო შესვლა საპატიმროში.

იუსტიციის მინისტრი რატი ბრეგაძე აცხადებს, რომ ისინი ექსპრეზიდენტის სანახავად არ შეუშვეს, რადგან სააკაშვილთან დაიშვებიან მხოლოდ საქართველოს პატიმრობის კოდექსით გათვალისწინებული ვიზიტორები. მისი განმარტებით, ამის მიზეზი სააკაშვილის ჯანმრთელობისა და უსაფრთხოების უზრუნველყოფასთან დაკავშირებით პენიტენციური სამსახურის ვალდებულების გათვალისწინებაა.

ოპოზიციური პარტიები აკრიტიკებენ ხელისუფლებას ევროპარლამენტარის საპატიმროში არშეშვების გამო. მათი განცხადებით, მთავრობამ საბოლოოდ ზურგი შეაქცია ევროპას.

მმართველ გუნდს არაერთხელ გაუკრიტიკებია ანა ფოტიგა იმ კრიტიკული ტონის გამო, რასაც ევროპარლამენტარი მათდამი იჩენს. პრემიერმინისტრმა კი საარჩევნო კამპანიის დროს განაცხადა, რომ არც ფოტიგა, არც კუბილიუსი მისთვის და ქვეყნისთვის არაფერს არ წარმოადგენენ.