ევროპარლამენტარი ანა ფოტიგა აცხადებს, რომ ელენე ხოშტარიასთან შეხვედრის შემდეგ უზარმაზარი ინსპირაცია იგრძნო და მისნაირი ადამიანები საქართველოს სჭირდება. მანვე აღნიშნა, რომ არ აქვს უფლება ვინმეს ეს მოუწოდოს, მაგრამ ჯანმრთელობის მდგომარეობიდან გამომდინარე მას შიმშილობის შეწყვეტა ურჩია.

"ელენე ხოშტარიასთან შეხვედრის შემდეგ უზარმაზარი ინსპირაცია ვიგრძენი. თუმცაღა ვურჩიე, მე უფლება არა მაქვს ვინმეს ლექციები წავუკითხო, მაგრამ მინდოდა, რომ მას დაესრულებინა შიმშილობა, მისი ჯანმრთელობის მდგომარეობიდან გამომდინარე", — განაცხადა ფოტიგამ.

12 ნოემბერს საქართველოში ევროპარლამენტარი ანა ფოტიგა და ლიეტუველი პარლამენტარები ჩამოვიდნენ, მათი მიზანი ექსპრეზიდენტ მიხეილ სააკაშვილის ციხეში მონახულება იყო. ფოტიგა მოშიმშილე ელენე ხოშტარიას შეხვდა, თუმცა ორი დღის განმავლობაში ვერ შეძლო შესვლა საპატიმროში.

იუსტიციის მინისტრი რატი ბრეგაძე აცხადებს, რომ ისინი ექსპრეზიდენტის სანახავად არ შეუშვეს, რადგან სააკაშვილთან დაიშვებიან მხოლოდ საქართველოს პატიმრობის კოდექსით გათვალისწინებული ვიზიტორები. მისი განმარტებით, ამის მიზეზი სააკაშვილის ჯანმრთელობისა და უსაფრთხოების უზრუნველყოფასთან დაკავშირებით პენიტენციური სამსახურის ვალდებულების გათვალისწინებაა.

ოპოზიციური პარტიები აკრიტიკებენ ხელისუფლებას ევროპარლამენტარის საპატიმროში არშეშვების გამო. მათი განცხადებით, მთავრობამ საბოლოოდ ზურგი შეაქცია ევროპას.

მმართველ გუნდს არაერთხელ გაუკრიტიკებია ანა ფოტიგა იმ კრიტიკული ტონის გამო, რასაც ევროპარლამენტარი მათდამი იჩენს. პრემიერმინისტრმა კი საარჩევნო კამპანიის დროს განაცხადა, რომ არც ფოტიგა, არც კუბილიუსი მისთვის და ქვეყნისთვის არაფერს არ წარმოადგენენ.