ევროპარლამენტარ ანა ფოტიგასთან შეხვედრის შემდეგ დროას ლიდერი ელენე ხოშტარია ამბობს, რომ მნიშვნელოვანია, ანა ფოტიგა და საქართველოს მეგობრები ხედავენ, რომ ჩვენი საზოგადოება უსამართლობას არ ეგუება და იბრძვის.

"მსგავსი ადამიანების აქტიური ჩართულობა ჩვენი დემოკრატიის პირველ რიგში მხარდასაჭერად არის ძალიან მნიშვნელოვანი. მე ამ მომენტამდე არ ვიცი ის შეძლებს თუ არა მიხეილ სააკაშვილთან შესვლას. ვხედავთ, რომ მიხეილ სააკაშვილის უფლებები წარმოუდგენლად ითელება და მისი ვერშესვლა იქნება ძალიან დიდი სკანდალი, კიდევ ერთი დიდი დარტყმა. რა თქმა უნდა, ძალიან მნიშვნელოვანი არის ის, რომ ანა ფოტიგა და ჩვენი ქვეყნის მეგობრებიც ხედავენ, რომ ჩვენი საზოგადოება, ჩვენ, პოლიტიკოსები, მოქალაქეები, აქტივისტები არ ვეგუებით და ვიბრძვით", — განაცხადა ხოშტარიამ.

პოლონელი ევროპარლამენტარი ანა ფოტიგა პარლამენტში ელენე ხოშტარიას და ბათუ ქუთელიას შეხვდა. შეხვედრის შემდეგ ანა ფოტიგას მედიასთან ოფიციალური კომენტარი არ გაუკეთებია, თუმცა ჟურნალისტებთან აღნიშნა, რომ ელენე ხოშტარიას გამამხნევებელი სიტყვები უთხრა.

ანა ფოტიგა საქართველოში დღეს, გამთენიისას ჩამოვიდა. მისი თბილისში ჩამოსვლის მიზანი პატიმრობაში მყოფ ექსპრეზიდენტის, მიხეილ სააკაშვილის მონახულებაა.

ელენე ხოშტარია საკანონდებლო ორგანოში მე-10 დღეა შიმშილობს. მისი მთავარი მოთხოვნა, ექსპრეზიდენტი მიხეილ სააკაშვილი სამოქალაქო კლინიკაში გადაიყვანაა.

9 ნოემბერს მან განაცხადა, თუ მის სიცოცხლეს საფრთხე შეექმნება, მედიკამენტებს მიიღებს, თუმცა შიმშილობის შეწყვეტას არც კი განიხილავს.