საფრანგეთის ელჩმა, დიეგო კოლასმა სტრასბურგის სასამართლოს გადაწყვეტილების კომენტირებისას განაცხადა, რომ ყველა პატიმარს აქვს ღირსების დაცვის უფლება და ამ შემთხვევაში, განსაკუთრებით, ყოფილ პრეზიდენტს. მისივე თქმით, სააკაშვილის მეგობრების მოთხოვნა, მისი ღირსებისა და უსაფრთხოების დაცვაზე, ლეგიტიმურია

"ბატონი მიხეილ სააკაშვილის ჯანმრთელობისა და უსაფრთხოების დაცვაზე ხელისუფლებაა პასუხისმგებელი. მთავრობა ზრუნავს ციხის სისტემის მთლიანობაზე, ხოლო სააკაშვილის მეგობრები და მხარდამჭერები — მის ღირსებაზე. ყველა პატიმარს აქვს ღირსების დაცვის უფლება და ამ შემთხვევაში, განსაკუთრებით, ყოფილ პრეზიდენტს და ეს მოთხოვნები ლეგიტიმურია. ვფიქრობ, რომ ძალიან მნიშვნელოვანი იქნება, რომ ყველა მხარემ სიფრთხილით იმოქმედოს", — განაცხადა ელჩმა მთავარი არხის თარგმანის მიხედვით.

სტრასბურგის სასამართლომ საქართველოს ხელისუფლებას შიმშილობის შემდეგ მიხეილ სააკაშვილის შესაბამისი მკურნალობა დაავალა. მათივე გადაწყვეტილებით, სახელმწიფომ, ციხეში და ზოგადად, სააკაშვილის უსაფრთხოება უნდა უზრუნველყოს. მათ მთავრობას სააკაშვილის ჯანმრთელობის ამჟამინდელი მდგომარეობის შესახებ ინფორმაციის მიწოდება სთხოვეს, სააკაშვილს კი შიმშილობის შეწყვეტისკენ მოუწოდეს.