ოქტომბერში საერთაშორისო ვიზიტორებმა საქართველოში 205 680 ვიზიტი განახორციელეს, რაც გასული წლის იმავე თვის მონაცემთან შედარებით 313%-ით მეტია, ხოლო 2019 წლის ოქტომბრის თვის მაჩვენებელს 69%-ით ჩამორჩება. ეს ნიშნავს იმას, რომ ტურიზმი ოქტომბერში პანდემიმადელ მონაცემებთან შედარებით 31%-ით არის აღდგენილი.

ასეთია იმ ქვეყნების ჩამონათვალი, რომელთა მოქალაქეებმაც ოქტომბერში ყველაზე მეტი უცხოური ვიზიტი განახორციელეს:

  1. თურქეთი — 35 829 ვიზიტი, წლიური ზრდა — 89%;
  2. რუსეთი — 29 159 ვიზიტი, ზრდა — 571%;
  3. სომხეთი — 19 301 ვიზიტი, ზრდა — 105%;
  4. საქართველო (არარეზიდენტი) — 16 437 ვიზიტი, ზრდა — 231%;
  5. უკრაინა — 14 567 ვიზიტი, ზრდა — 1 230%;
  6. ისრაელი — 13 944 ვიზიტი, ზრდა — 9 134%;
  7. ყაზახეთი — 8 843 ვიზიტი, ზრდა — 1 250%;
  8. საუდის არაბეთი — 8 748 ვიზიტი, ზრდა — 437 300%;
  9. აზერბაიჯანი — 8 358 ვიზიტი, ზრდა — 113%;
  10. პოლონეთი — 5 398 ვიზიტი, ზრდა — 9 370%.

რაც შეეხება მიმდინარე წლის პირველი ათი თვის მაჩვენებლებს, როგორც საზღვრის კვეთის მონაცემებიდან ხდება ცნობილი, 2021 წლის იანვარ-ოქტომბერში საქართველოში სულ 1 393 914 უცხოური ვიზიტი განხორციელდა — ეს გასული წლის იმავე პერიოდის მაჩვენებელს 1,8%-ით, ხოლო 2019 წლის იანვარ-ოქტომბრის მონაცემს 79%-ით ჩამორჩება.

ამ დროისათვის ტურიზმიდან მიღებული შემოსავლების ოქტომბრის თვის მონაცემები არ არის ცნობილი. ეროვნული ბანკის შეფასებით, 2021 წლის იანვარ-სექტემბერში ტურიზმიდან 866 მლნ დოლარის შემოსავალი მივიღეთ, რაც გასული წლის შესაბამისი პერიოდის მონაცემს 73,5%-ით აღემატება. აქვე უნდა ითქვას, რომ მიმდინარე წელს მიღებული ტურისტული შემოსავლები 2019 წლის იმავე პერიოდის მაჩვენებელს 66,5%-ით ჩამორჩება.