საქართველოს სახალხო დამცველის წარმომადგენელი ამბობს, რომ რუთავის ციხიდან გლდანში გადაყვანლი ექსპრეზიდენტი მანქანიდან ძალის გამოყენებით გამოიყვანეს, რადგან ის უარს აცხადებდა. ჟურნალისტების კითხვას, აღენიშნება თუ არა მიხეილ სააკაშვილს ფიზიკური დაზიანებები, მიხეილ ღონღაძე პასუხობს, რომ დაზიანებები არ შეუნიშნავს, თუმცა წარმოება მიმდინარეობს.

"ფიზიკურად დაზიანებები მე ვერ შევნიშნე. თუმცა წარმოება მიმდინარეობს, ინფორმაციები გამოთხოვილია. მას არ უნდოდა გადმოსვლა #18 დაწესებულებაში, გამოიყვანეს მანქანიდან ძალის გამოყენებით. მანქანიდან გადმოყვანა და შესახლება მოხდა ძალის გამოყენებით, ვინაიდან, პროტესტის ნიშნად აცხადებდა უარს, არ გადმოდიოდა მანქანიდან და გადმოიყვანეს. მოკიდეს ხელი და აიყვანეს საკანში", — თქვა მან გლდანის #18 დაწესებულებიდან გამოსვლის შემდეგ.

მისივე ინფორმაციით, ექსპრეზიდენტი აგრძელებს შიმშილობას, უარს აცხდებს სამედიცინო ჩარევაზე და სურს საერთო პროფილის კლინიკაში გადაყვანა.

ღონღაძემ ასევე აღნიშნა, რომ სააკაშვილს ესმის პატიმრების ყვირილი მისი მისამართით, თუმცა მის პერიმეტრზე პატიმრები არ არიან და ის საკანში მარტოა.