ნაციონალური მოძრაობის წევრი, ვანო მაღალაშვილი პარლამენტის შენობასთან პოლიციამ დააკავა.

"ვანო მაღალაშვილი პოლიციამ გაიტაცა პარლამენტის უკანა შესასვლელიდან. ინტერვიუ მივეცით ვსაუბრობდით და უცბად თქვენ სატელევიზიო კომენტართან დაკავშირებით საქმე გვაქვსო და მანქანაში ჩატენეს.

ქართული ოცნების ბოლო რეპრესიული გაბრძოლება!", — წერს აქტივისტი, ირაკლი ფავლენიშვილი ფეისბუქვგვერდზე.

აღნიშნულზე On.ge შინაგან საქმეთა სამინისტროს დაუკავშირდა, სადაც განგვიცხადეს, რომ ის ადმინისტრაციულ სამართალდარღვევათა კოდექსის 166-ე და 173-ე მუხლების საფუძველზე დააკავეს, რაც გულისხმობს წვრილმან ხულიგნობასა და პოლიციისადმი დაუმორჩილებლობას.

6 ნოემბერს რუსთავში მიმდინარე აქციაზე ნაციონალური მოძრაობის ლიდერმა, ნიკა მელიამ სააკაშვილის კლინიკაში გადასაყვანად ხელისუფლებას 24-საათიანი ვადა მისცა. თუმცა მელიას მიერ მთავრობისთვის მიცემული ულტიმატუმის დრო გუშინ ამოიწურა — ექსპრეზიდენტი სამოქალაქო კლინიკაში არ გადაუყვანიათ, რაც იმას ნიშნავს, რომ დღეს 8 საათზე თავისუფლების მოედანზე აქცია გაიმართება.