სტრატეგია აღმაშენებლის ლიდერი, გიორგი ვაშაძე დღესმ თავისუფლების მოედანზე დაგეგმილ აქციას შეუერთდება. მისი თქმით, აქციები და პროტესტი კონსტიტუციით გარანტირებული უფლებაა, რომელიც აუცილებლად გამოიყენონ მშვიდობიანი გზით ქვეყნის დასახსნელად სამოქალაქო დაპირისპირებისგან.

"ვითარება, რომელიც დღეს არის, შეუძლებელია, რომ ასე გაგრძელდეს. წარმოუდგენელია, ყოველ წუთს მძიმე ფიზიკური დაპირისპირების საფრთხის წინაშე ვიყოთ, ამიტომ ვაპირებთ მშვიდობიანად მივიღოთ მონაწილეობა აქციაში", — აცხადებს ის.

გარდა ამისა, ვაშაძემ დღეს სამოქალაქო დაპირისპირების თავიდან აცილების სტრატეგია წარადგინა. მისი განცხადებით, შექმნილ ვითარებაში გამოსავლის ძიება ყველას პასუხისმგებლობა და მოვალეობაა.

6 ნოემბერს რუსთავში მიმდინარე აქციაზე ნაციონალური მოძრაობის ლიდერმა, ნიკა მელიამ სააკაშვილის კლინიკაში გადასაყვანად ხელისუფლებას 24-საათიანი ვადა მისცა. თუმცა მელიას მიერ მთავრობისთვის მიცემული ულტიმატუმის დრო გუშინ ამოიწურა — ექსპრეზიდენტი სამოქალაქო კლინიკაში არ გადაუყვანიათ, რაც იმას ნიშნავს, რომ დღეს 8 საათზე თავისუფლების მოედანზე აქცია გაიმართება.

სააკაშვილი უკვე 39-ე დღეა შიმშილობს. 6 ნოემბერს, ექსპრეზიდენტის მხარდამჭერი აქციის დაწყებამდე, პენიტენციურმა სამსახურმა გაავრცელა კადრები, სადაც, მათი მტკიცებით, მიხეილ სააკაშვილი "საკვებს იღებს". უწყებამ ვიდეოს გამოქვეყნება "მაღალი საზოგადოებრივი ინტერესით" ახსნა. ექიმები და ომბუდსმენი განმარტავენ, რომ ეს არის საკვები დანამატი და არა საჭმელი, რაც საერთაშორისო პროტოკოლით არის განსაზღვრული და შიმშილობის დარღვევად არ მიიჩნევა.

ინფორმაცია იმაზე, რომ სააკაშვილი საკვებ დანამატებს იღებს, ვიდეოს გავრცელებამდე ერთი დღით ადრე, 5 ნოემბერს იუსტიციის მინისტრმა, რატი ბრეგაძე გაავრცელა. 6 ნოემბერს სახალხო დამცველმა განაცხადა, რომ სააკაშვილის პატიმრობის პირობებისა და ჯანმრთელობის შესახებ განსაკუთრებული კატეგორიის პერსონალური მონაცემების გაცემისა და საჯაროდ გამოქვეყნების საკითხს შეისწავლიდა. მანვე აღნიშნა, რომ ექსპრეზიდენტი 30 ოქტომბრიდან წვენებსა და მინერალური შემცველობის პიურეებს სამედიცინო დანიშნულებით, მცირე ოდენობით იღებდა.