პაატა ბუჭულაძე აცხადებს, რომ მზადაა, ციხეში ექსპრეზიდენტ მიხეილ სააკაშვილს "ჩაენაცვლოს". ამის შესახებ ის Facebook-ზე წერს, სადაც მთავრობას აკრიტიკებს.

"მე არ მინდა ვიყო მესამე პრეზიდენტის მკვლელობის თანამონაწილე. ქართულო ოცნებავ, ყველაფერში არღვევთ კანონებს: ითვისებთ წაგებულ არჩევნებს, იჭერთ უდანაშაულო ადამიანებს და თქვენივე კუთვნილი სასამართლოთი თქვენებურად ასამართლებთ. გთხოვთ, კიდევ ერთხელ დაარღვიოთ კანონი და მომცეთ საშუალება ჩავანაცვლო მესამე პრეზიდენტი ციხეში", — წერს ბურჭულაძე.

გარდა ამისა, ის მმართველ პარტიას მოუწოდებს, მიხეილ სააკაშვილს მულტიფუნქციურ საავადმყოფოში მკურნალობის ნება მისცენ და წერს, რომ თუ მთავრობა მის თხოვნას გაითვალისწინებს, დღესვე ჩამოვა საქართველოში.

ბურჭულაძის განცხადებით, მთავრობა მისი თხოვნის დაკმაყოფილებით ქვეყნისთვის ორ დიდ საქმეს გააკეთებს:

"საქართველოს არ შეიყვანთ ველური ქვეყნების სიაში და ბიძინა ივანიშვილს ძალიან ასიამოვნებთ. მას ერთდროულად ორი პატიმარი ეყოლება, რომლებსაც ვერ იტანს".

პაატა ბურჭულაძე პირველი არ არის, ვინც მიხეილ სააკაშვილის "ჩანაცვლების" სურვილი გამოთქვა. პირველ ნოემბერს მსგავსი განცხადება გააკეთა თბილისის ყოფილმა მერმა და ფოთის მერობის კანდიდატმა, გიგი უგულავამაც. მან თქვა, რომ წამითაც არ დაფიქრდება.

მიხეილ სააკაშვილი პირველ ოქტომბერს დააკავეს. ის ბრალს არ აღიარებს და უკვე 35-ე დღეს შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა სამოქალაქო კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, რაზეც ყოფილი პრეზიდენტი უარს აცხადებს.