დეპუტატი, სალომე სამადაშვილი აცხადებს, რომ პრეზიდენტმა, სალომე ზურაბიშვილმა, ის ისტორიული შანსი გაუშვა ხელიდან, როდესაც უკეთესი მომავლის ფურცლის დაწერა შეეძლო. ასე ეხმაურება ის პრეზიდენტის მიერ დღეს გამართულ ბრიფინგს.

"ფარისევლობაა პოლარიზაციაზე საუბარი, როდესაც ზუსტად იცი, რომ მის დასასრულებლად თუ არა, განსამუხტად, გასაღები ჯიბეში გიდევს. პიროვნილი ტრაგედიაა, რომ პოლიტიკოსი ვერ გრძნობს იმ ისტორიულ წამს, როდესაც მისი ქვეყნის თანამედროვე ისტორიაში შეუძლია ახალი, უკეთესი მომავლის ფურცელი დაწეროს. ქვეყნის ტრაგედიაა, რომ პრეზიდენტმა ეს ისტორიული შანსი ხელიდან გაუშვა. ისტორიას ხომ საბოლოოდ მხოლოდ მსგავს წამებში მიღებული გადაწყვეტილება რჩება", — დაწერა სამადაშვილმა Facebook გვერდზე.

დღეს, 3 ნოემბერს პრეზიდენტმა, სალომე ზურაბიშვილმა საგანგებო ბრიფინგი ჩანიშნა. ბუნებრივია, ექსპრეზიდენტ სააკაშვილის შიმშილობის 34-ე დღეს, მაშინ, როდესაც ქვეყანაში მისი გათავისუფლების მოთხოვნით დღეში რამდენიმე აქცია იმართება, საზოგადოება ზურაბიშვილისგან, პირველ რიგში, ამ საკითხზე ელოდა განცხადებას, თუმცა პრეზიდენტმა ბრიფინგი "თავისუფლად ჩატარებული" არჩევნების შეჯამებით, შედეგებზე საუბრითა და მილოცვებით დაიწყო, შემდეგ კი პანდემიაზე, ვაქცინაციაზე და ამ საკითხისადმი ეკლესიის დამოკიდებულებაზე ისაუბრა.

გაიგე მეტი: