"ღმერთი ისე ნამდვილად არ მომკლავს, რომ ერთხელ თავაწეულმა არ გავიარო გამარჯვებული ბათუმის ბულვარში", — წერს ექსპრეზიდენტი, მიხეილ სააკაშვილი ახალ წერილში, რომელიც ბათუმში მიმდინარე აქციის დროს ოპოზიციის მერობის კანდიდატმა, გიორგი კირთაძემ წაიკითხა.

"ახლა საქართველოს გადარჩენისთვის ბრძოლაში უკან დასახევი ყველა გზა ჩახერგილია და სამშობლოს გადარჩენას ალტერნატივა არ აქვს. ამიტომ ყველა უნდა გაერთიანდეს, ისინიც კი, ვინც აქამდე მიმდინარე პროცესებს თვალს გვერდიდან ადევნებდნენ. თქვენ ივანიშვილი დიდი უპირატესობით უკვე დაამარცხეთ, რაც მთელმა საქართველომ და ყველა საერთაშოროსო დამკვირვებელმა იცის. ახლა ეს ბრძოლა გამარჯვებამდე უნდა მივიყვანოთ.

თავისუფალების კვარტალი თქვენი მოგონილია, ესაა თქვენი ლამაზი, ამაყი, თვითმყოფადი, დამოუკიდებელი განწყობის ქალაქი. ახლა მთავარია თავისუფლების კვარტლად მთელი საქართველო ვაქციოთ და ყველგან, სადაც თავისუფლებისთვის ვიბრძვით, ისინი უნდა გავხსნათ. აქაც, ციხესთან თავისუფლების კვარტალმა უნდა გამიხსნას დილეგის კარი.

ღმერთი ისე ნამდვილად არ მომკლავს, რომ ერთხელ თავაწეულმა არ გავიარო გამარჯვებული ბათუმის ბულვარში, ბრძოლის დროშა, რომელიც ბათუმში ახლა მაღლა ფრიალებს, არასოდეს უნდა დაეშვას", — განაცხადა მან.

ბათუმში ოპოზიციის აქცია მიმდინარეობს. იქ შეკრებილები არიან ოპოზიციური პარტიების ლიდერები, მათ შორის, ნიკა მელია, მამუკა ხაზარაძე, ბადრი ჯაფარიძე და ელენე ხოშტარია. როგორც ნაციონალური მოძრაობის ლიდერმა, ნიკა მელიამ სიტყვით გამოსვლისას განაცხადა, ბრძოლა არ დასრულებულა და ახლა იწყება.

პარალელურად, დღეს აქცია გაიმართება რუსთავის ციხესთან, სადაც ექსპრეზიდენტი, მიხეილ სააკაშვილი 32-ე დღეა შიმშილობს.

30 ოქტომბერს საქართველოში ადგილობრივი თვითმმართველობის არჩევნები ჩატარდა. ცესკომ წინასწარი შედეგები გამოაქვეყნა, რის მიხედვითაც წალენჯიხა ერთადერთი მუნიციპალიტეტია, სადაც ოპოზიციის კანდიდატი იგებს. სხვა დიდ ქალაქებსა და თვითმმართველ თემებში მმართველი გუნდის კანდიდატები იგებენ ან ლიდერობენ.

შედეგებთან დაკავშირებით განცხადება იმავე ღამეს გააკეთა ოპოზციის თბილისის მერობის კანდიდატმა თბილისში, ნიკა მელიამ და არჩევნებს "გაუქმებული" უწოდა. მისი თქმით, ბევრ მუნიციპალიტეტში ოპოზიციის მოპოვებული გამარჯვება ქართული ოცნების დამფუძნებელმა, ბიძინა ივანიშვილმა მოიპარა და "ვითომც არ იყო მოპოვებული ისე წაიღო, საკუთარ სხვადასხვა რეზიდენციებში".