რუსთავის მე-12 პენიტენციურ დაწესებულებასთან ექსპრეზიდენტის, მიხეილ სააკაშვილის გათავისუფლების მოთხოვნით ნაციონალური მოძრაობის აქცია მიმდინარეობს. ორგანიზატორების თქმით, აქციები პერმანენტული იქნება და ყოველდღიურად გაიმართება. ენმ-ის წევრის, ზაალ უდუმაშვილის განცხადებით, ბრძოლის მთავარი ხაზი სააკაშვილის თავისუფლებაზე გადის.

"დღეს დღის წესრიგში დგას ერთადერთი მოთხოვნა — თავისუფლება მიშა სააკაშვილს. მიშა სააკაშვილს თავისუფლებაზე გადის ჩვენი ბრძოლის ხაზი და ის თუ როგორ წარიმართება საქართველოში პოლიტიკური პროცესები. ამიტომ, როგორც მიხეილ სააკაშვილი იბრძვის, ყველამ უნდა ავიღოთ პასუხისმგებლობა ჩვენს თავზე, თითოეულმა ჩვენთაგანმა და ჩვენი წვლილი შევიტანოთ ამ ბრძოლაში", — თქვა უდუმაშვილმა აქციზე.

პარალელურად, აქცია იმართება ბათუმშიც. მთავრობის სასახლესთან შეკრებილები არიან ოპოზიციური პარტიების ლიდერები, მათ შორის, ნიკა მელია, მამუკა ხაზარაძე, ბადრი ჯაფარიძე და ელენე ხოშტარია. როგორც ნაციონალური მოძრაობის ლიდერმა, ნიკა მელიამ სიტყვით გამოსვლისას განაცხადა, ბრძოლა არ დასრულებულა და ახლა იწყება.

30 ოქტომბერს საქართველოში ადგილობრივი თვითმმართველობის არჩევნები ჩატარდა. ცესკომ წინასწარი შედეგები გამოაქვეყნა, რის მიხედვითაც წალენჯიხა ერთადერთი მუნიციპალიტეტია, სადაც ოპოზიციის კანდიდატი იგებს. სხვა დიდ ქალაქებსა და თვითმმართველ თემებში მმართველი გუნდის კანდიდატები იგებენ ან ლიდერობენ.

შედეგებთან დაკავშირებით განცხადება იმავე ღამეს გააკეთა ოპოზიციის თბილისის მერობის კანდიდატმა თბილისში, ნიკა მელიამ და არჩევნებს "გაუქმებული" უწოდა. მისი თქმით, ბევრ მუნიციპალიტეტში ოპოზიციის მოპოვებული გამარჯვება ქართული ოცნების დამფუძნებელმა, ბიძინა ივანიშვილმა მოიპარა და "ვითომც არ იყო მოპოვებული ისე წაიღო, საკუთარ სხვადასხვა რეზიდენციებში".

ამის შემდეგ, ოპოზიციამ მთელი საქართველოს მასშტაბით აქციები დააანონსა. დღეს, 2 ნოემბერს ოპოზიციის მხარდამჭერები ბათუმსა და რუსთავში შეიკრიბნენ. ხვალ კი აქცია იქნება ზუგდიდშიც. რაც შეეხება დედაქალაქს, თბილისში ოპოზიციის მხარდამჭერები 6 ნოემბერს შეიკრიბებიან.

ექსპრეზიდენტი მიხეილ სააკაშვილი დაკავების დღიდან, უკვე 33-ე დღეა შიმშილობს.