საზღვაო აკადემიიდან გათავისუფლებული ვაჟა ანანიძის საქმე აღსრულების ეროვნულმა ბიურომ, შემდგომი რეაგირების მიზნით, პროკურატურას გადასცა. როგორც ვაჟა ანანიძის ადვოკატმა, ანა ბერძენიშვილმა, On.ge-სთან საუბრისას აღნიშნა, საზღვაო აკადემია ცდილობს სხვადასხვა მიზეზის მოფიქრებას, რათა გვერდი აუაროს ბათუმის სასამართლოს გადაწყვეტილებას და არ შეასრულოს ის.

"ბათუმის სასამართლოს გადაწყვეტილებას ალტერნატივა არ აქვს. ეს არის სასამართლო გადაწყვეტილება და უნდა აღსრულდეს. რა ფორმით აღასრულებს ამას აკადემია — შტატს დაამატებს, შტატს შეამცირებს, დასაქმებულ სხვა პირს გაათავისუფლებს სამსახურიდან და ა.შ. აღსრულების თვითონ მექანიზმი იძლევა ინტერპრეტაციის საშუალებას. რა ფორმით აღასრულებს, ეს არც ვაჟა ანანიძის, არც მისი წარმომადგენლების, არც აღსრულების ეროვნული ბიუროს პრეროგატივა არ არის. გადაწყვეტილება უნდა აღსრულდეს და ვაჟა ანანიძე უნდა აღდგეს კოორდინატორის ტოლფას პოზიციაზე", — განაცხადა მან.

მისივე თქმით, 23 დღის განმავლობაში საზღვაო აკადემიამ სასამართლოს არცერთი გადაწყვეტილება არ შეასრულა.

"სასამართლო გადაწყვეტილებიდან გასულია 23 დღე და ამ დროის განმავლობაში ვერ მოხერხდა თანხა, 3 თვის ანაზღაურება ვაჟა ანანიძეს ჩარიცხოდა. ამიტომ საუბარი იმაზე, რომ საზღვაო აკადემიამ შეასრულა სასამართლო გადაწყვეტილება, არის ბუნებრივია ალოგიკური" — თქვა ანა ბერძენიშვილმა.

იმის გასარკვევად დაიწყო თუ არა საქმის წარმოება On.ge პროკურატურას დაუკავშირდა და მათგან პასუხს ველოდებით.

ანანიძე საზღვაო აკადემიიდან 2020 წელს გაათავისუფლეს, მას შემდეგ ის მუდმივად აპროტესტებდა ამ ფაქტს და სასამართლოსაც მიმართა. სასამართლოს 2021 წლის 7 ოქტომბრის გადაწყვეტილებით, ბათუმის საზღვაო აკადემიას ვაჟა ანანიძის სამსახურში აღდგენა, ასევე, კომპენსაციისა და განაცდურის ანაზღაურება დაევალა. 19 ოქტომბერს ვაჟა ანანიძემ On.ge-სთან საუბრისას აღნიშნა, რომ ის იურიდიულ დავასა და პროტესტს აგრძელებს.

გაიგე მეტი: