ცენტრალურმა საარჩევნო კომისიამ უკვე ყველა ქალაქსა და თვითმმართველ თემში ხმების 100% დათვალა. წინასწარი მონაცემებით, წალენჯიხის გარდა ყველგან ქართული ოცნების მერობის კანდიდატები იგებენ.

გუშინ, კენჭისყრის პროცესის დასრულებიდან მალევე გამოქვეყნდა ორი ეგზიტპოლის განსხვავებული შედეგები, რომელთა ნახვის შემდეგაც, გამარჯვება აღნიშნეს როგორც მმართველ პარტიაში, ისე ოპოზიციაში.

კერძოდ, მთავარი არხის ეგზიტპოლით, ოპოზიცია ყველა დიდ ქალაქში იგებდა, ტელეკომპანია იმედის დაკვეთით ჩატარებულ ეგზიტპოლის მიხედვით კი, 4 დიდ ქალაქში მმართველი გუნდის კანდიდატები ლიდერობდნენ. იმედს არ წარმოუდგენია ზუგდიდის მონაცემები.

თბილისი

უბნების 100% ყველაზე ბოლოს ცესკომ დედაქალაქში დაითვალა. წინასწარი შედეგებით, თბილისში მმართველი პარტიის კანდიდატი, კახა კალაძე იგებს და მას ხმათა 55,60% აქვს. რაც შეეხება ოპოზიციის კანდიდატს, ნიკა მელიას, მან ხმების 44,40% აიღო.

განსხვავებული იყო ეს მონაცემი ეგზიტპოლებში. იმედის დაკვეთით ჩატარებული GORBI-ს კვლევის მიხედვით, კალაძე კონკურენტს 15%-ით უსწრებდა. იმედის ეგზიტპოლის შედეგები ასეთი იყო:

  • კახა კალაძე — 57,2%;
  • ნიკა მელია — 42,8%.

რაც შეეხება მთავარი არხის ეგზიტპოლს, რომელიც ანოვამ ჩაატარა, აქ ნაციონალური მოძრაობის კანდიდატი ნიკა მელია ლიდერობდა. ამ შემთხვევაში შედეგები შემდეგნაირად გადანაწილდა:

  • ნიკა მელია — 51%;
  • კახა კალაძე — 49%.

ქუთაისი

ცენტრალური საარჩევნო კომისიის წინასწარი მონაცემებით, ქუთაისშიც ქართული ოცნების კანდიდატი იგებს. იოსებ ხახალეიშვილს ხმათა 51,643% აქვს და მხოლოდ მცირედით უსწრებს ნაციონალური მოძრაობის კანდიდატს, ხატია დეკანოიძეს, რომელმაც 48,357% აიღო.

ტელეკომპანია იმედის ეგზიტპოლის მიხედვით, ქუთაისშიც მმართველი პარტია ლიდერობდა. ასეთი იყო შედეგები:

  • იოსებ ხახალეიშვილი — 51,9%;
  • ხატია დეკანოიძე — 48,1%.

მთავარი არხის მიერ წარმოდგენილი მონაცემებით კი, ხატია დეკანოიძე კონკურენტს 6%-ით უსწრებდა:

  • ხატია დეკანოიძე — 53%;
  • იოსებ ხახალეიშვილი — 47%.

რუსთავი

რუსთავში ქართული ოცნების კანდიდატი, ნინო ლაცაბიძე ცესკოს მიერ წარმოდგენილი შედეგებით ლიდერობს და 53,717% აქვს. რაც შეეხება ნაციონალური მოძრაობის კანდიდატს, დავით კირკიტაძეს, მან 46,283% აიღო.

შედეგები მცირედით განსხვავდებოდა იმედის დაკვეთით ჩატარებულ კვლევაში. ის ასე განაწილდა:

  • ნინო ლაცაბიძე — 53,8%;
  • დავით კირკიტაძე — 46,2%.

მთავარი არხის დაკვეთით ჩატარებული ეგზიტპოლის შედეგებში კი, ოპოზიციის კანდიდატი 6%-ით ლიდერობდა:

  • დავით კირკიტაძე — 53%;
  • ნინო ლაცაბიძე — 47%;

ბათუმი

ცენტრალური საარჩევნო კომისიის წინასწარი მონაცემებით, ბათუმსაც მმართველი პარტია იგებს. არჩილ ჩიქოვანს ხმათა 51,018% აქვს, ხოლო გიორგი კირთაძეს — 48,982%.

მცირე სხვაობით უსწრებდა ჩიქოვანი ნაციონალური მოძრაობის კანდიდატს GORBI-ის ეგზიტპოლშიც. კერძოდ:

  • არჩილ ჩიქოვანი — 50,8%;
  • გიორგი კირთაძე — 49,2%.

მთავარი არხის კვლევის შემთხვევაში კი, ქართული ოცნების კანდიდატი ოპოზიციის კანდიდატს 2%-ით ჩამორჩებოდა:

  • გიორგი კირთაძე — 51%;
  • არჩილ ჩიქოვანი — 49%.

ზუგდიდი

რაც შეეხება ზუგდიდს, ცესკოს შედეგებით ქართული ოცნების კანდიდატმა, მამუკა წოწერიამ 51,631% მიიღო, ანზორ მელიამ ნაციონალური მოძრაობიდან — 48,369%.

როგორც უკვე აღვნიშნეთ, ტელეკომპანია იმედს ზუგდიდის მონაცემები არ ჰქონდა, ხოლო მთავარი არხის მიერ წარმოდგენილი შედეგები ასეთი იყო:

  • ანზორ მელია — 53%;
  • მამუკა წოწერია — 47%.

ნახეთ არჩევნების მეორე ტურის შედეგები დეტალურად On.ge-ზე: