ნაციონალური მოძრაობის დეპუტატის, ანი წითლიძის განცხადებით, ზუგდიდის ერთ-ერთ საარჩევნო უბანზე კომისიის წევრი, თინა კაკაჩია ბიულეტენებთან ერთად ოთახში ჩაიკეტა, რის გამოც მან პოლიცია გამოიძახა. ამასთან, მისი თქმით, კაკაჩიას აღმოუჩინა ბლოკნოტი, სადაც საჯარო მოხელეების სახელი-გვარები და ტელეფონის ნომრები იყო ჩანიშნული.

"მას შემდეგ, რაც მე მივედი და პოლიცია გამოვიძახე ადგილზე, ქალბატონი კომისიის წვერი ქართული ოცნებიდან, თინა კაკაჩია ჩაიკეტა ოთახში ბიულეტენებთან ერთად და მთელი ნახევარი საათი ჩაკეტილი ოთახში იყო და ნაცვლად იმისა, რომ პოლიციამ გაერკვია, რატომ იყო ჩაკეტილი, მთლიანად გამოაძევეს ჩვენი კომისიის წევრები. ჩვენ ასევე ადგილზე ჩაგვივარდა კაკაჩიას ბლოკნოტი, სადაც სახელი და გვარები იყო საჯარო მოხელეების, სიტყვა-სიტყვით ეწერა, რომ საჯარო მოხელეები, რომლებიც უნდა აიძულონ, ხმა მისცენ ქართულ ოცნებას, მათი შვილები, ოჯახის წევრები", — განაცხადა მან.

უბანზე მყოფი ერთ-ერთი პირის განცხადებით, წითლიძემ და მისმა წარმომადგენლებმა კომისიის წევრს ჩანთა "მოჰპარეს", აიღეს ბლოკნოტი და "ჟურნალისტები შეყარეს". იმავეს ამბობს კომისიის წევრი, თინა კაკაჩიაც.

"ესე იგი, აღიარებთ, რომ მომპარეს ჩანთიდან ბლოკნოტი და 20 ლარი", — თქვა მან ჟურნალისტებთან.

აღნიშნულს ზუგდიდში დაპირისპირება მოჰყვა, რის შემდეგაც პოლიციამ წითლიძე მანქანაში ჩასვა და ტერიტორიიდან გაიყვანა. მოგვიანებით, ის TV პირველის პირდაპირ ეთერში ჩაერთო და განაცხადა, რომ ზუგდიდის სამმართველოს შენობაში იმყოფება.