პრეზიდენტმა სალომე ზურაბიშვილმა და ევროპარლამენტის სადამკვირვებლო მისიის წარმომადგენლებმა ქვეყანაში შექმნილი პოლიტიკური ვითარება განიხილეს. პრეზიდენტის ადმინისტრაციის ინფორმაციით, შეხვედრაზე ისაუბრეს პოლიტიკური გარემოს პოლარიზაციასა და მის დაძლევაზე.

"პრეზიდენტის განცხადებით, სწორედ მწვავე პოლარიზაციის გამო ძალიან ბევრი მნიშვნელოვანი საკითხი, როგორიცაა ოკუპაცია, პანდემია და ვაქცინაცია, რეგიონული და შავი ზღვის უსაფრთხოების საკითხები, ყურადღების მიღმა რჩება და არჩევნების შემდეგ ქვეყანამ აქტიურად უნდა განაგრძოს ევროპული და ევროატლანტიკური ინტეგრაციის პროცესი და სახელმწიფო ინსტიტუტების გაძლიერება", — წერია განცხადებაში.

პრეზიდენტის ადმინისტრაცია აღნიშნავს, რომ ზურაბიშვილმა ევროპარლამენტარების დელეგაციას დეტალური ინფორმაცია მიაწოდა საქართველოს ოკუპირებულ ტერიტორიებზე არსებული მძიმე ჰუმანიტარული ვითარების შესახებ.