ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, მიხეილ სარჯველაძე ამბობს, რომ მოლოდინს გადააჭარბა გუშინ, ქართული ოცნების წინასაარჩევნო აქციაზე შეკრებილი მოქალაქეების რაოდენობამ. სარჯველაძის შეფასებით, აქციაზე შეკრებილების ენთუზიაზმი "უპრეცედენტოდ დიდი" იყო.

"მე ვფიქრობ, ყველამ კარგად დაინახა რა ზომის და რა წონის მასშტაბი იყო იმავდროულად. სიმართლე გითხრათ, ჩემთვის, მაგალითად, მოლოდინსაც გადააჭარბა, ერთმნიშვნელოვნად, იმის გათვალისწინებით, რომ მართლაც, უპრეცედენტოდ დიდი იყო ენთუზიაზმი მოქალაქეებისა, რომლებიც მობრძანდნენ აქციაზე", — განაცხადა მიხეილ სარჯველაძემ.

გუშინ, 27 ოქტომბერს, ქართული ოცნების წინასაარჩევნო აქცია გაიმართა. აქციამდე რამდენიმე დღის განმავლობაშ ვრცელდებოდა ინფორმაცია, რომ სახელმწიფო სამსახურში დასაქმებულებს, მათ შორის ბაღებისა და სკოლების თანამშრომლებს აქციაზე წასვლა აიძულეს, რასაც ისინი საჯაროდ არ ადასტურებენ. რამდენიმე მედია ამბობს, რომ შეკრების მონაწილეებს ფულიც გადაუხადეს, მმართველი პარტია კი მხოლოდ კვებისა ხარჯების დაფინანსებას ადასტურებს.

სხვადასხვა რაიონიდან მიკროავტობუსებით ხალხის ჩამოყვანა დილიდან დაიწყო. ჟურნალისტები მთელი დღის განმავლობაში ცდილობდნენ, მოქალაქეებისგან მიეღოთ პასუხები, სად და რატომ მიდიან ასე მობილიზებულად. მიზეზი ცხადი იყო, თუმცა რატომღაც მმართველი გუნდის მხარდამჭერები, რომლებმაც უარი არ/ვერ თქვეს რამდენიმესაათიან მგზავრობაზე, რთული ეპიდვითარების დროს ხალხმრავალ ღონისძიებაზე შეკრებასა და ქართული ოცნების მხარდაჭერაზე, მედიას თამამად ვერ ეუბნებოდნენ, რომ თბილისში აქციაზე მიდიან. პირბადეში, სათვალეებსა და ქუდებში ჩამალულები, ხშირად კი ერთმანეთის ზურგს ამოფარებულები კითხვებს გაურბოდნენ. ნაწილი ჟურნალისტებს აგრესიულად "იგერიებდა", ნაწილი კი ხუმრობით ან ირონიულად აცხადებდა, რომ მიდის ქორწილში, სასეირნოდ, საყიდლებზე, "საგულაოდ", ბულვარში, სატირალში და ა.შ. იყვნენ ისეთებიც, რომლებიც ამ ტიპის პასუხებს მხოლოდ იმიტომ ამბობდნენ, რომ აშკარად ეს იყო პირველი, რაც მოაფიქრდათ.

გაიგე მეტი: