აშშ-ის სურსათისა და მედიკამენტების ხარისხის კონტროლის სააგენტოს (FDA) მრჩეველთა კომისიამ 5-დან 11 წლამდე ასაკის ბავშვებში კომპანიების Pfizer და BioNTech მიერ შექმნილი კორონავირუსის საწინააღმდეგო ვაქცინის გამოყენების რეკომენდაცია გასცა. ეს იმას ნიშნავს, რომ მალე მათ შესაძლოა, მარეგულირებელი ორგანოსგან საბოლოო ნებართვაც მიიღონ.

მიმდინარე წლის 26 ოქტომბერს გამართულ შეხვედრაზე სპეციალისტებმა განიხლეს, რამდენად ეფექტიანი და უსაფრთხოა მცირეწლოვნებისთვის ეს პრეპარატი. მათ მოსალოდნელი რისკები და სარგებელი განიხილეს, რის შედეგადაც კომისიის 18-მა წევრმა Pfizer-BioNTech-ის ვაქცინით პატარების იმუნიზაციას მხარი დაუჭირა, 1-მა კი თავი შეიკავა.

შეგახსენებთ, რომ კომპანიებმა ახლახან კლინიკური ცდის შედეგები გაასაჯაროეს. მასში მონაწილეობა 2,268-მა ბავშვმა მიიღო, რომელთაც მედიკოსებმა ორგანიზმში ვაქცინის შედარებით მცირე დოზები შეუყვანეს, ვიდრე 12 წელს ზემოთ ასაკის ინდივიდებს. კერძოდ, მათ 21 დღის შუალედით 10 მიკროგრამი პრეპარატის შემცველი 2 ინიექცია გაუკეთეს. 1 თვეში ცდისპირებს კორონავირუსის მიმართ ისეთივე იმუნიტეტი ჩამოუყალიბდათ, როგორც მათზე მოზრდილებს, რომლებიც კონტროლ ჯგუფს წარმოადგენდნენ.

კვლევის ფარგლებში მწვავე გვერდითი ეფექტი არ გამოვლენილა. დაფიქსირდა მხოლოდ ისეთი სტანდარტული უკუჩვენებები, როგორიცაა ნანემსრის შესიება, ტკივილი ამ მიდამოსა და თავის არეში, მაღალი ტემპერატურა და ციება.

აღსანიშნავია, რომ ხმის მიცემამდე კომისიამ ისეთ რისკებზეც იმსჯელა, როგორიცაა მიოკარდიტი და პერიკარდიტი. Pfizer-BioNTech-ის ვაქცინის გაკეთების შემდეგ, ამგვარი უკუჩვენებები საკმაოდ იშვიათია, თუმცა მაინც გასათვალისწინებელია. FDA-ს წარმომადგენლებმა მათ ხელთ არსებულ მონაცემებზე დაყრდნობით დაასკვნეს, რომ ეს იმუნიზაციის სარგებელს ვერ გადაწონის, რაც მათ გადაწყვეტილებაზეც აისახა.

გადაჭრით პასუხი მოგვიანებით გვეცოდინება. მანამდე ისინი აშშ-ის დაავადებათა კონტროლისა და პრევენციის ცენტრებში მომუშავე ექსპერტებს შეხვდებიან, რაც 2-3 ნოემბერსაა მოსალოდნელი. ბოლო სიტყვა სწორედ მათ ეკუთვნით.