ინფექციური საავადმყოფოს დირექტორის, თენგიზ ცერცვაძის განცხადებით, ის ემხრობა სავალდებულო ვაქცინაციას ცალკეული ჯგუფებისთვის, თუმცა, მთავრობისგან არ არის მზაობა. ცერცვაძის აზრით, კორონავირუსის საწინააღმდეგო ვაქცინა სავალდებულო უნდა იყოს პედაგოგებისთვის, ექიმებისთვის და ორსულებისთვის.

"მე, პირადად, მიმაჩნია, რომ ან მოსახლეობა გათავისუფლდება ამ რაღაც ესეთი სიურრეალისტური, ვთქვათ, გავლენებისგან და შემობრუნდება მასობრივი ვაქცინაციისკენ და პირბადეების ტარებისკენ ან მთავრობა იძულებული იქნება შემოიღოს სავალდებულო ვაქცინაცია, რაც არ უნდა პროტესტი მოჰყვეს ამას [...]

ამას მე ვემხრობი. განიხილება [სავალდებულო ვაქცინაცია], მაგრამ უარყოფილია, ანუ ჯერჯერობით არ არის მზაობა მთავრობის იმისკენ, რომ დააწესოს სავალდებულო ვაქცინაცია ცალკეული ჯგუფებისთვის, პირველ რიგში, პედაგოგებისთვის, ექიმებისთვის, ორსულებისთვის და ა.შ", — განაცხადა თენგიზ ცერცვაძემ.

საქართველოს ჯანდაცვის სექტორის წარმომადგენლებს არაერთხელ უსაუბრიათ, უნდა იყოს თუ არა ვაქცინაცია სავალდებულო. მაგალითად, ჯანდაცვის მინისტრი, ეკატერინე ტიკარაძე ვერ ხედავს საფუძველს, რომ ვაქცინაცია საქართველოში სავალდებულო გახდეს. ამავე პოზიციას იზიარებს თამარ გაბუნიაც. მისი თქმით, თეორიულადაც არ არსებობს იმის ალბათობა, რომ ვაქცინაცია სავალდებულო გახდეს. რაც შეეხება დაავადებათა კონტროლის ეროვნული ცენტრის დირექტორს, ამირან გამყრელიძეს, ის პედაგოგების სავალდებულო ვაქცინაციას მხარს უჭერს.