სახალხო დამცველი, ნინო ლომჯარია პრემიერმინისტრ ირაკლი ღარიბაშვილის განცხადებებს მიხეილ სააკაშვილის შიმშილობასთან დაკავშირებით არაჰუმანურს უწოდებს. ჟურნალისტმა მას სთხოვა შეეფასებინა ღარიბაშვილის ის განცხადება, სადაც პრემიერმინისტრი ექსპრეზიდენტის შიმშილობას დიეტას ადარებს. ასევე, მმართველი პარტიის სხვა პირების პოლიტიკური შეფასებები სააკაშვილის მიერ თაფლის მიღებასთან დაკავშირებით.

"მიუღებელია. მე თავიდანვე არ მოვიწონე და დავგმე ამ ტიპის განცხადებები. ნამდვილად, არაჰუმანურია უბრალოდ, შეგვიძლია ვთქვათ. იმიტომ, რომ პირველ რიგში, ექიმები ნამდვილად ადასტურებენ, რომ ვითარება არ არის მარტივი და გარკვეული წინაპირობები უკვე სახეზე არის სავარაუდო გართულებების. ამიტომ, რა თქმა უნდა, არ არის ეს ადამიანური და ჰუმანური დამოკიდებულება", — განაცხადა ლომჯარიამ TV პირველის ეთერში.

სახალხო დამცველის შეფასებით, მსგავსი განცხადებები უარყოფითად მოქმედებს არა მხოლოდ კონკრეტულად სააკაშვილის, არამედ სხვა მოშიმშილე პატიმრებზეც.

"მსგავსი განცხადებები აქეზებს მოშიმშილე პატიმარს, რომ საკუთარ ჯანმრთელობას კიდევ უფრო მეტი ზიანი მიაყენოს. არა მხოლოდ მიხეილ სააკაშვილს არამედ იცით, რომ სხვა პატიმრებიც ძალიან მკაცრი ფორმებით შიმშილობდნენ და მათზე ძალიან ცუდად აისახა მსგავსი ტიპის საჯარო განცხადებები. ზოგადად, ეს არ არის ადამიანური და არის, ვფიქრობ, ღირსების შემლახავი", — განაცხადა ლომჯარიამ.

გუშინ, ირაკლი ღარიბაშვილმა განაცხადა, რომ სააკაშვილს უნდა "ყველამ მის დიეტაზე თუ შიმშილობაზე ვილაპარაკოთ", დღეს კი თქვა, რომ აღარ აინტერესებს სააკაშვილის "შიმშილობა თუ დიეტა".

შიმშილობის დაწყებიდან დაახლოებით ერთი კვირის შემდეგ, ცნობილი გახდა, რომ მიხეილ სააკაშვილი თაფლს იღებს, რასაც პოლიტიკური შეფასებები მოჰყვა. მაგალითად, იგივე ღარიბაშვილმა თქვა, რომ "როცა ადამიანი ამბობს, რომ შიმშილობს, ნახევარ კილოგრამ თაფლს არ უნდა ჭამდეს"; დეპუტატმა ირაკლი ზარქუამ განაცხადა, რომ რადგან ექსპრეზიდენტი თაფლს იღებს, ე.ი. საკმაოდ კალორიულ კვებაზეა; ქართული ოცნების თავმჯდომარის, ირაკლი კობახიძის შეფასებით, სააკაშვილს შესანიშნავი პირობები აქვს და ციხეში კი არა კურორტზეა. მსგავსი შეფასებების შემდეგ, სააკაშვილმა გადაწყვიტა უფრო მკაცრ შიმშილობაზე გადასულიყო.

მიხეილ სააკაშვილი 20 დღეა შიმშილობს. გუშინ, 19 ოქტომბერს ჯანდაცვის სამინისტროს ბაზაზე შექმნილმა ექიმთა მულტიფუნქციურმა ჯგუფმა სააკაშვილის ციხეში პირველად მოინახულა და მისი პროფილაქტიკური ჰოსპიტალიზაციის რეკომენდაცია გასცა. იმავე დღეს, სააკაშვილის პირადმა ექიმმა, ნიკოლოზ ყიფშიძემ განაცხადა, რომ ექსპრეზიდენტის ნებართვის შემთხვევაში მას, სავარაუდოდ შაბათს, კლინიკაში გადაიყვანენ.

დღეს, მიხეილ სააკაშვილმა ციხიდან მორიგი წერილი გამოაგზავნა, სადაც წერის, რომ შიმშილობას არ შეწყვეტს, მაგრამ ექიმების მხრიდან მედიკამენტოზურ ჩარევაზე თანახმაა.